काठमाडौँ । सर्वोच्च अदालतका प्रश्तावित न्यायाधिश सुनिलकुमार पोखरेलले आफू न्यायाधीश नियुक्त भएमा निर्दोष व्यक्ति लामो समय थुनामा बस्नुपर्ने अवस्थाको अन्त्य गर्ने बताउनुभएको छ ।
सोमवार संसदीय सुनुवाई समितिको बैठकमा आफ्नो अवधारणापत्र तथा कार्ययोजना प्रस्तुत गर्दै प्रश्तावित न्यायाधीश पोखरेलले न्यायाधीशको समयको कारणले निर्दोष व्यक्ति थप थुनामा रहनुपर्ने अवस्थाको अन्त्य गर्ने बताउनुभएको हो । उहाँले न्याय सम्पादन गर्दा पहिलो प्राथमिकता राज्यलाई, दोस्रो प्राथमिकता व्यक्तिलाई र तेस्रो प्राथमिकता सरकारलाई दिने प्रतिवद्धता व्यक्त गर्नुभयो । उहाँले न्याय सम्पादनका क्रममा आफु समक्ष आएका विवादलाई नपन्छाउने बताउनु भयो । त्यस्तै, कसैप्रति पूर्वाग्रह नराखी, संविधान कानून र न्यायका मान्यताहरुका आधारमा निर्णय लिने पनि उहाँले स्पष्ट पार्नुभयो । उहाँले आफ्नो न्यायिक मन र विवेकमा प्रश्न उठाउने वातावरण नबनाउने पनि बताउनु भयो ।
उहाँले भन्नुभयो – ‘न्याय सम्पादनका क्रममा देहायका आधारमा कहिल्यै विचलित नहुने भन्ने म प्रतिवद्धता गर्न चाहन्छु : नेपालको संविधान, कानुन, विधिशास्त्रिय मान्यता, सर्वोच्च अदालतबाट प्रतिपादित नजिर र असल अभ्यास् । नागरिकका आधारभुत र मौलिक हक प्रत्याभुत गर्ने सवालमा राज्यले अन्तर्राष्ट्रिय मञ्चमा जनाएको प्रतिवद्धता, सर्वोच्च अदालतबाट निरन्तर कार्यान्वयनमा रहेको रणनीतिक योजनाको लक्ष्य, न्यायाधीशको पेशागत आचारसंहिता, न्यायिक नेतृत्वले लिएको लक्ष्य र प्राप्त सुझाव, आम नागरिकको न्यायमा पहुँच पुर्याउन सक्ने असल अभ्यास, संविधानमा प्रचलित कानूनले कोरिदिएको सिमा, पेशी तोकिएको मुद्दामा न्यायाधीशको समयको कारणले निर्दोष व्यक्ति थप थुनामा रहनुपर्ने अवस्थाको अन्त्य र न्याय सम्पादन गर्दा पहिलोमा राज्य, त्यसपछि व्यक्ति र त्यसपछि सरकारलाई प्राथमिकतामा राखिनेछ र यो तीनैवटा सबको समान दूरीमा राखेर मुद्दाको सुनुवाई गरिनेछ भन्ने कुराको प्रतिवद्धता जारी गर्न चाहन्छु ।’
‘न्याय सम्पादनका क्रममा आफू समक्ष आएका विवादलाई नपन्छाई, कसैप्रति पूर्वाग्रह नराखी, संविधान कानून र न्यायका मान्यताहरुका आधारमा निर्णय लिनेछु भन्ने कुरामा दृढ छु । न्यायाधीशको निर्णयबाट एउटा पक्षको हार र अर्को पक्षको जितको अवस्था स्वभाविक हुन्छ । यो जित र हारको अवस्था न्यायाधीशको ईच्छामा नभई संविधान, कानून र प्रमाणको आधारमा तय हुन्छन् भन्ने अनुरोध गर्न चाहन्छु । यस्तो अवस्थामा मुद्दाका पक्षहरुले न्याय सम्पादन गर्ने न्यायाधीशमाथि न्यायिक मन र विवेकमा प्रश्न उठाउने वातावरण बन्न हुन्न भन्ने म सदैव सचेत रहन चाहन्छु । यस्तो अवस्था आइहाल्यो भने न्यायको संरक्षण गर्नु जनप्रतिनिधिमुलक संस्था, संसद र राज्यको चौथो अंगको रुपमा रहेको प्रेस जगतको पनि दायित्व हो भन्ने मलाई लागेको छ । यस समितिले न्यायाधीशको रुपमा मेरो नाम अनुमोदन गरेमा नेपालको संविधान, कानूनले अंगिकार गरेको मुल्य र मान्यतालाई शिरोधार्य गरी सर्वोच्च अदालतको न्यायाधीशको रुपमा न्यायाधीशको भुमिकामा दृढ निश्चयी भइ काम गर्ने प्रतिवद्धता व्यक्त गर्न चाहन्छु । न्यायपालिकाको जनआस्था अभिवृद्धि र देखिने किसिमले न्याय सम्पादन गर्दै न्यायको स्वच्छता र निष्पक्षताको कसिमा अब्बल साबित हुने इमान्दार प्रयास गर्नेछु ।’
प्रश्तावित न्यायाधीश पोखरेलले संविधान, कानुनले अंगिकार गरेको मुल्य र मान्यतालाई शिरोधार्य गरी काम गर्ने प्रतिवद्धता गर्नुभयो । उहाँले न्यायपालिकाको जनआस्था अभिवृद्धि र देखिने किसिमले न्याय सम्पादन गर्दै न्यायको स्वच्छता र निष्पक्षताको कसिमा अब्बल सावित हुने इमान्दार प्रयास गर्ने पनि उल्लेख गर्नुभयो ।
