काठमाडौं । त्रिदेशीय कप अन्तर्राष्ट्रिय फुटबलको उपाधि नेपालले जितेको छ । दशरथ रंगशालामा सोमबार बेलुका भएको उक्त खेलमा आयोजक टोली नेपालले बंगलादेशलाई २-१ गोलले पराजित गर्दै उपाधि जितेको हो ।
खेलको १७ औं मिनेटमा नेपालका लागि सन्जोग राईले गोल गर्दै सुरुवाती अग्रता दिलाएका थिए । उनी डेब्यु गरेको दोस्रो खेलमा गोल गर्न सफल रहे । यस्तै ४१ औं मिनेटमा विशाल राईले गोल गरे । उनले उत्कृष्ट गोल गर्दै नेपालको अग्रता दोब्बर पारे । यस्तै खेलको ८२ औं मिनेटमा बंगलादेशका महबुब रेहमानले गोल गर्दै बंगलादेशलाई खेलमा फर्काएका थिए । \
खेलमा निकै नै दबदबा राखेको नेपालले गोल गर्ने थुप्रै अवसरहरु पाएको थियो । खेलको ७ औं मिनेटमा त्रिदेव गुरुङले गोल गर्ने राम्रो अवसर गुमाएका थिए ।
यस्तै १६ औं मिनेटमा अनन्त अनन्त तामाङले हेडमार्फत प्रहार गरेको बल बंगलादेशका गोलकिपरले बललाई पञ्च गरेर पोस्टबाहिर फालेका थिए । यस्तै २९ औं मिनेटमा अञ्जन बिस्टले पनि गोल गर्ने राम्रो अवसर गुमाउन पुगे ।
उनले बललाई चिप गरेर पोस्टमाथि फ्याँक्न पुगेका थिए । ४४ औं मिनेटमा अनन्त तामाङले गोल गर्ने राम्रो अवसर पाएका थिए । खेलको ७० औं मिनेटमा रवि पासवानले गोल गर्ने अवसर गुमाउन पुगेका थिए । यस्तै खेलको ८७ औं मिनेटमा बंगलादेशका कप्तान जमालले फ्रिकिकबाट राम्रो गोल गर्ने प्रयास गरेका थिए । उक्त बल पोस्टबाट बाहिरिन पुगेको थियो ।
यसैबीच नेपाल राष्ट्रिय फुटबल टिमका कप्तान बिराज महर्जनले सन्यास लिने घोषणा गरेका छन् । उनले नेपालका लागि सर्वाधिक क्याप लिँदै राष्ट्रिय टिमबाट सन्यास लिएका छन् ।