काठमाडौँ । पोखराको एक होटलमा अचेत अवस्थामा भेटिएकी महिलाको मृत्यु भएको छ ।
मंगलबार पोखराको नागढुंगास्थित युनिक होटलमा तनहुँ भिमादकी ३८ वर्षीया सुकु विक अचेत अवस्थामा फेला परेकी थिईन् । होटलबाट उद्धार गरेर विकलाई चरक मेमोरियल अस्पतालमा उपचारका लागि लगिएको थियो । अस्पताल लगिएको केहिबेरमा डाक्टरले उनलाई मृत घोषणा गरिदिए ।
उनी पोखरा नागढुंगाकै शिला रेस्टुरेन्टमा २ वर्षदेखि काम गर्दै आएकी थिईन् । प्रारम्भिक अनुसन्धानमा घटना शंकास्पद देखिएको कास्कीका सूचना अधिकारी डीएसपी श्रवणकुमार विकले जनाए । घटनापूर्व विक र एक जना पुरुष होटलको कोठामा प्रवेश गरेका र साँझसम्म उनी ननिस्किएपछि होटल सञ्चालकले खोजी गर्दा अचेत अवस्थामा फेला परेका थिइन् ।
घटना अनुसन्धानका लागि प्रहरीले ६ जनालाई नियन्त्रणमा लिएको छ । विकको शव पोष्टमार्टमका लागि पोखरा स्वास्थ्य विज्ञान प्रतिष्ठान लगिएको छ । घटनाबारे थप अनुसन्धान भईरहेको प्रहरीले बताएको छ ।
