काठमाडौँ । टी–२० विश्वकप एसिया छनोटको पहिलो खेलमा कुशल भुर्तेलको आक्रमक ब्याटिङमा नेपालले सिंगापुरलाई आठ विकेटले हराएको छ ।
१४६ रनको लक्ष्य पछ्याएको नेपालले १६.३ ओभरमा दुई विकेट गुमाएर आफ्नो लक्ष्य पुरा गर्यो । नेपालको लागि कुशल भुर्तेलले शानदान अर्धशतक बनाए । उनले २७ बलमा ६ चौका र २ छक्काको सहयोगमा टी-२० अन्तर्राष्ट्रिय क्रिकेटमा सातौं अर्धशतक बनाए । भुर्तेलले ४८ बलमा ८ चौका र दुई छक्का प्रहार गर्दै ७४ रन बनाउदै आउट भए ।
यस्तै तेस्रो स्थानमा आएका कप्तान रोहित पौडेलले २ चौका र २ छक्कासहित ३५ रन बनाउदै नटआउट रहे । चौथो स्थानमा आएका कुशल मल्लले एक छक्का प्रहार गर्दै नेपाललाई जिताए ।
ओपनर आसिफ शेख २६ बलमा २ चौका र एक छक्कासहित २७ रन बनाएर आउट भए । पहिलो विकेटको लागि कुशल भुर्तेल र आसिफले ८४ रनको साझेदारी गरेका थिए ।
यसअघि कीर्तिपुरस्थित त्रिभुवन विश्वविद्यालयको क्रिकेट क्रिकेट मैदानमा टस जितेर पहिले व्याटिङ रोजेको सिङ्गापुरले निर्धारित २० ओभरमा ९ विकेट गुमाउँदै १४५ रन बनाएको थियो । सिङ्गापुरका लागि युवा ओपनर रोहन रङ्गराजनले सर्वाधिक ४६ रन बनाएका थिए । उनले ३० बलमा ९ चौका र १ छक्कासहित ४६ रन बनाए । त्यस्तै आर्यवीर चौधरीले ३७, मनप्रित सिंहले २४ तथा अक्षा पुरीले १३ रन जोडे ।
नेपालका लागि अभिनाश बोहोराले तीन विकेट लिए भने सन्दिप लामिछाने, गुल्सन झा र करण केसीले समान दुई/दुई विकेट लिए ।
अब नेपालले दोस्रो खेलमा मंगलबार मलेसियासँग खेल्नेछ ।
फोटो- क्यान
