इजरायल र हमास बीचको युद्धका कारण संकटमा परेका गाजा क्षेत्रका लाखौं प्यालेस्टिनीका लागि अत्यावश्यक मानवीय सहायताका सामग्री बोकेका ट्रकहरु राफा बोर्डर हुँदै गाजा क्षेत्र प्रवेश गर्न थालेका छन् । करिब ३००० हजार टन सामग्री बोकेका २०० वटा ट्रक राफा हुँदै गाजा प्रवेश गर्न लागेका हुन् ।
गत अक्टोबर ७ मा हमास लडाकूले दक्षिणी इजरायलमा प्रवेश गरेर नरसंहार मच्चाए पछि इजरायलले पनि त्यसको बदलामा गाजा क्षेत्रमा अन्धाधुन्ध हवाई आक्रमण गरेको थियो ।
इजरायलले गाजा क्षेत्रलाई हवाई, स्थल र सामुद्रिक तीनै तर्फबाट नाकाबन्दी गर्दै औषधि, पानी, इन्धन, खाद्यान्न समेतका सबै वस्तुको प्रवेशलाई रोकेको थियो ।
इजरायली हवाई हमलाबाट घाइते, महिला, बालबच्चा समेतलाई अत्यावश्यक सामग्रीको आपूर्ति बन्द भएसँगै गाजा क्षेत्रमा चरम मानवीय संकट उत्पन्न भएको थियो । जसलाई अन्तर्राष्ट्रिय समुदायले निन्दा गरेको थियो ।
गाजाको दक्षिण सीमास्थित इजिप्टसँगको सीमानाका राफा खुलेसँगै ट्रकहरु गाजा प्रवेश गर्न थालेका छन् । यद्यपी यी ट्रकहरु पनि इजरायली हवाई आक्रमणको निशाना बन्न सक्ने अन्तर्राष्ट्रिय संचार माध्यमहरुले अनुमान गरिरहेका छन् ।
इजरायलले हमासलाई निमिट्यान्न पार्ने अठोटका साथ गाजासँगको सीमामा झण्डै तीन लाख सेना तैनाथ गरेको छ । ट्याँक समेतका आधुनिक हातहतियार सहितका यी सैनिक गाजामा आक्रमणका लागि सरकारको आदेशको प्रतिक्षा गरिरेहका छन् ।
इजरायलले गाजामा पैदल सेना मार्फत् आक्रमण गरे त्यसबाट थप मानवीय क्षति हुने अनुमान गरिएको छ । यद्यपी संयुक्त राज्य अमेरिकाले गाजामा आक्रमण गर्नुअघि बलियो रणनीति बनाउन आवश्यक रहेको र यसको असर मध्यपूर्वका अन्य देशमा पर्न नदिन जोड दिइरहेको बताइन्छ ।
उता, शुक्रबार राति नै हमासले कब्जामा राखेका मध्ये दुई जना अमेरिकी नागरिकलाई मुक्त गरिदिएका छन् । कतारको मध्यस्थतामा छुटेका २ अमेरिकीमा जुडिथ रानान र उनकी १७ वर्षीया छोरी नाटाली रहेका छन् ।
