काठमाडौँ । स्वास्थ्य तथा जनसंख्यामन्त्री मोहनबहादुर बस्नेतले स्वास्थ्यकर्मीको अभाव परिपूर्ति गर्न सरकारले काम गरिरहेको बताउनुभएको छ ।
शुक्रवार शिक्षा,स्वास्थ्य तथा सूचना प्रविधि समितिमा स्वास्थ्यमन्त्री बस्नेतले एउटा स्वास्थ्यकर्मीले चार जना बराबरको काम गर्न नसक्ने भन्दै दरबन्दी थप्ने विषयमा सबैको सहमति जुटिसकेको र अब छिटै प्रक्रिया अघि बढ्ने बताउनुभएको हो ।
उहाँले दरबन्दी बढाउन नसकेसम्म स्वास्थ्य क्षेत्रको समाधान गर्न नसकिने अवस्था रहेको पनि बताउनु भयो । दरबन्दी यही ढंगमा रहिरहे जतिसुकै कडा कानून ल्याएपनि समस्या समाधान गर्न नसकिने मन्त्री बस्नेतको भनाई छ । उहाँले स्वास्थ्यकर्मीहरुको सुरक्षाका सन्दर्भमा सरकार गम्भिर भएर लाग्ने बताउनु भयो । शान्ती सुरक्षाको हिसावले स्वास्थ्य क्षेत्रलाई व्यवस्थित गर्नु सबैको दायित्व भएको बताउनु भयो । मन्त्री बस्नेतले चिकित्सा शिक्षा ऐन परिमार्जन गरेर चिकित्सा क्षेत्रको समस्या समाधान गरिने बताउनु भयो ।
मन्त्री बस्नेतले भन्नुभयो, ‘दरबन्दी यही ढंगबाट रहिरह्यो भने यस्ता घटनाहरु जतिसुकै कडा कानूनी प्रतिवद्धता जायर गरेपनि समस्या समाधान गर्न सक्दैनौं । हरेक छलफलमा दरबन्दीका कुरा उठाइरहेको छु । यो कुरामा प्रधानमन्त्री पनि गम्भिर हुनुभएको छ । यो अन्तिम अवस्थामा पुगेको छ । सुर्तिजन्य पदार्थमा उठेको करलाई मात्रै व्यवस्थित गर्दै क्यान्सर रोगको उपचार र दरबन्दी शुरु गर्न सकियो भने राम्रो हुन्छ । यो विषय धेरै पोजेटिभ भएको छ । चिकित्सा शिक्षा ऐनले केही राम्रो पक्ष पनि शुरुवात भएको छ । तर, त्यो शुरुवात भएको कुरालाई हाम्रो राष्ट्रले पुगेन । स्वास्थ्यकर्मीहरु निकै कम उत्पादन भयो । यही अवस्था रहे सीता खोजे झैँ खोज्नुपर्ने हुन्छ ।
ऐनको परिमार्जनको कुरा मैले उठाएँ । एकथरी साथीले यो कुरा उठाउनु भयो भने तपाईको राजिनामा माग्न सक्छन् भने । तर म बोलीरहे । यो विषय वस्तु गम्भिर छ भनेरपनि प्रधानमन्त्री ज्युले भन्नुभएको थियो । अहिले चिकित्सा शिक्षा ऐनमा भएको कमजोरी सुधार्न संशोधन प्रकृया अगाडी जाने प्रक्रियामा छ । चिकित्सा शिक्षा आयोगले प्रदान गरेको छात्रवृत्तिमा झन्डै तीन अर्ब वार्षिक खर्च हुन्छ । अहिलेकै अवस्थामा २९ हजार नर्स चाहिन्छ । अहिले स्थानीय तहमा पनि स्वास्थ्यकर्मी चाहिएको छ ।
अहिले छात्रवृत्ति कोटामा थपिएको अवस्था छ । दरबन्दी बढाउन सकिएन भने एउटा डाक्टरले चार जना बराबरको काम गर्न सक्दैन । म माननीय ज्युहरुलाईपनि भन्न चाहन्छु, कोही बिरामी पर्यो, बेवारिसे छ, भने तपाईहरुले मलाई टिपाईदिनुहोस् । पैसा नभएको कारणले कोही व्यक्ति त्यसै मर्न पर्दैन । हामीले यस्ता खालका बिरामीहरुलाई तीन चार जनादेखि १७/१८ जनासम्मलाई अस्पताल पठाएका छौँ । यसमा डाक्टर साबहरुले सहयोग गर्नुभएको छ । शान्ती सुरक्षाको हिसावले यो क्षेत्रलाई व्यवस्थित गर्ने हामी सबैको दायित्व हो ।’
मन्त्री बस्नेतले प्रयोगविहीन स्वास्थ्यका उपकरणलाई समुचित तरीकाले व्यवस्थापन मिलाइएको बताउनु भयो ।
