काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठले आफूसँग असम्बन्धित छलफलमा समेत बोलाएको भन्दै राज्य व्यवस्था समितिसमक्ष आक्रोश पोख्नुभएको छ ।
अख्तियार दुरुपयोग ऐनलाई संशोधन गर्न बनेको विधेयकबारे छलफल गर्न आइतबार बिहान बोलाइएको समितिको बैठकमा प्रधानमन्त्री तथा मन्त्रिपरिषदको कार्यालयले प्रस्तुत गरेको विधेयकमाथिको छलफलमा आफू असम्बन्धित भए पनि समितिले आउनै पर्ने भनेकोमा उहाँले असन्तुष्टि जनाउनुभयो ।
“समितिका सभापतिले तपाईं नआई बैठक चल्न दिन्न भन्नुभयो, म सदासयता देखाएर मात्र आएको हो”, गृहमन्त्री श्रेष्ठले भन्नुभयो, “म संसद्लाई सम्मान गर्छु, संसदीय समितिलाई सम्मान गर्छु, तर लोकतान्त्रिक मूल्य मान्यता पनि त हुँदो हो नि ! हामी पद्दतिमा चल्नु पर्यो ।”
उहाँले आफू आएका बेलामा सबै विषयमा प्रश्न राख्ने भने संसद्मा जस्तै प्रश्नउत्तर राख्न सुझाव दिँदै भन्नुभयो, “म आएको बेलामा सधैँ यसरी प्रश्न गर्ने हो भने संसद्मा जस्तै गृहमन्त्रीसँग प्रश्नोत्तर राखिदिनुहोस् न समितिमा पनि । म आइहाल्छु नि, मन्त्री भएका कारण उठ, आइज भन्ने हुन्छ र !”
