काठमाडौँ । काठमाडौँको एक होटलमा पूर्वराजा ज्ञानेन्द्र शाह र उपप्रधान तथा गृहमन्त्री नारायणकाजी श्रेष्ठको जम्काभेट भएको छ ।
एक कार्यक्रममा सहभागी भएका उहाँहरु एकै टेबलमा बसेर केही कुराकानी गरेकोजस्तो तस्बिरमा देखिन्छ । तर उहाँहरुका बीचमा कुराकानी भयो भएन या के विषयमा कुराकानी भयो भन्ने बारेमा भने थाहा हुन सकेन ।
काठमाडौँको बत्तिसपुतलीमा रहेको द्वारिकाज होटलमा उहाँहरुबीच भेट भएको हो । केही दिन अघि नेपाल आउनुभएका भारतीय गुरु जग्गी बसुदेव (सद्गुरू) लाई भेट्न दुवै जना द्वारिकाज होटल पुगेका बेला सो भेटघाट भएको समाचार स्रोतले बतायो ।
आइतबार साँझ सद्गुरुलाई भेट्न उहाँहरु होटल द्वारीकाज पुग्नुभएको थियो । सो होटलमा पूर्वराजा शाह पुगेलगत्तै उपप्रधानमन्त्री श्रेष्ठ पनि पुग्नुभएको थियो । उहाँहरु दुवै जना एकै टेबलमा बसेर सद्गुरूसँग छलफल गर्नुभएको थियो ।स्रोतका अनुसार छलफलमा नेपालको विभिन्न क्षेत्रका अरु पनि करिब १५ जनाजति सहभागी भएका थिए । सो टेबलामा पूर्वराजा शाह, उहाँसँगै सद्दुरु र उपप्रधानमन्त्री श्रेष्ठका साथ पर्यटन व्यवसायी तथा होटल होटल द्वारिकाजका सञ्चालक अम्बिका श्रेष्ठ हुनुहुन्थ्यो ।
सद्गुरु दुई दिन अघि नेपाल आउनुभएको थियो । उहाँलाई त्रिभुवन अन्तर्राष्ट्रिय विमानस्थलको विशिष्टकक्षमा उपप्रधानमन्त्री नारायणकाजी श्रेष्ठले स्वागत गर्नुभएको थियो ।
