इङलिस प्रिमियर लिग अन्तर्गत आइतबार साँझ भएको खेलमा लिभरपुलले एस्टनभिल्लालाई ३–० गोल अन्तरले पराजित गरेको छ । लिभरपुलको जितमा एस्टलभिल्लाको एक आत्मघाती गोल पनि समावेश थियो ।
लिभरपुलका लागि तेस्रो मिनटमै डोमिनिक सोबोजलाइले गोल गरेका थिए । खेलमा ६४ प्रतिशत बल नियन्त्रणमा राखेको लिभरपुलले एस्टनभिल्लामाथि लगातार आक्रमण गरेको थियो ।
पहिलो र दोस्रो दुबै हाफमा लिभरपुलले एस्टनभिल्लाको गोलपोस्टमा १७ पटक आक्रमण गरेको थियो । यही क्रममा एस्टनभिल्लाका म्याटी क्यासीले २२ औं मिनेटमा आत्मघाती गोल गरेका थिए ।यसैमा लिभरपुल रोकिएको थिएन । लिभरपुलका लागि ५५औं मिनेटमा मोहम्मद सलाहले टिमका लागि तेस्रो गोल गरेर जित पक्का गरेका थिए ।
यो जितसँगै लिभरपुलले चार खेलबाट १० अंक जोडेर लिगमा तेस्रो स्थानमा उक्लेको छ । चार खेल खेलेका म्यान्चेस्टर सिटी १२ अंकका साथ पहिलो र टोटेनह्याम १० अंकका साथ दोस्रो स्थानमा छन् । १० अंक नै रहेको वेस्टह्याम युनाइटेड चौथो स्थानमा छ ।
आजै राति आर्सनल र म्यान्चेस्टर युनाइटेड बीच खेल हुनेछ ।
