एजेन्सी । एसिया कप अगस्ट ३० बाट सुरु भएको छ । यसपटक पाकिस्तान र श्रीलंकामा हाइब्रिड मोडलको खेल हुँदैछ ।
पाकिस्तानमा टोली पठाउन भारत सरकारको विरोधलाई मध्यनजर गर्दै उसका खेलहरू श्रीलंकामा हुँदैछन् । एसिया कपमा दुई खेल खेलिएका छन् । पहिलो खेल नेपाल र पाकिस्तानबीच अगस्ट ३० मा मुल्तानमा भएको थियो ।
दोस्रो खेल श्रीलंका र बंगलादेशबीच श्रीलंकाको क्यान्डीमा भएको थियो । तर दुवै खेलमा टोलीको जर्सीमा आयोजक पाकिस्तानको नाम र एसिया क्रिकेट काउन्सिलको लोगो थिएन ।
पाकिस्तानका पूर्व क्रिकेटर मोहसिन खान र राशिद लतिफलगायत धेरै खेलाडीले यसका लागि पाकिस्तान क्रिकेट बोर्ड (पीसीबी) र एसियाली क्रिकेट काउन्सिल (एसीसी) को आलोचना गरेका छन् । पीसीबी र एसीसीले एसीसीको लोगोसँगै जर्सीमा पाकिस्तानको नाम किन छैन भन्ने कुरा स्पष्ट गर्नुपर्ने उनीहरुको अडान छ ।
गत वर्ष टी–२० एसिया कपमा आयोजक श्रीलंकाको नाम एसीसीको लोगोमा थियो । जबकि श्रीलंकामा आर्थिक मन्दी र राजनीतिक अस्थिरताका कारण प्रतियोगिताका खेल युएईमा खेलाइएको थियो ।
अर्कोतर्फ, आलोचनापछि पीसीबीले आफ्नो स्पष्टीकरणमा एसीसीले गत वर्ष नै प्रतियोगिताको लोगोमा आयोजक राष्ट्रको नाम नदिने निर्णय गरेको जनाएको छ । पीसीबीको यो सफाई फ्यानले पचाउन सकेका छैनन् । यदि त्यसो हो भने पीसीबीले यो प्रस्ताव कसरी स्वीकार गर्यो किनभने १५ वर्षपछि पाकिस्तानले बहुराष्ट्रिय प्रतियोगिता आयोजना गरिरहेको उनीहरुको भनाइ छ ।
समाचार एजेन्सी पीटीआईको रिपोर्टका अनुसार पाकिस्तानका एक पूर्व खेलाडीले नाम न छाप्ने सर्तमा यसो हुनुको कारण एसीसी अध्यक्ष र बीसीसीआई सचिव जय शाह रहेको बताएका छन् ।उनले भारत र पाकिस्तानबीचको सम्बन्ध खराब रहेको बताए ।
यस्तो अवस्थामा भारतको एसिया कपको जर्सीमा अहिले पाकिस्तानको नाम राख्नु ठीक होइन भन्ने बिसिसिआईले सोचेको हुनुपर्छ । लतिफले पनि यो सम्भावनालाई अस्वीकार गर्दैनन् र कारण जे भए पनि यसबारे स्पष्टता आवश्यक रहेको उनी बताउँछन् ।
