काठमाडौं । नेकपा एमालेका शीर्ष नेताहरूलाई लिएर जनकपुर उडेको बुद्ध एयरको जहाजमा प्राविधिक समस्या देखिएपछि काठमाडौं नै फर्केको छ ।
बुद्ध एयरको उडान नम्बर ५०१ जहाज ९ एन एजेडओ जहाज जनकपुरधाम विमानस्थलमा अवतरण गर्ने बेलामा समस्या देखिएपछि काठमाडौं फर्काइएको कम्पनीले जनाएको छ ।
सो जहाजमा एमालेका वरिष्ठ उपाध्यक्ष ईश्वर पोखरेल, उपाध्यक्षहरू सुवास नेम्वाङ, विष्णु पौडेल, युवराज ज्ञवाली, अष्टलक्ष्मी शाक्य, उपमहासचिव प्रदीप ज्ञवाली, विष्णु रिमाल, अमृत बोहरा लगायतका नेताहरु बैठकका लागि सिरहा जाँदै थिए । अहिले उनिहरुलाई बुद्ध एयरको अर्को जहाजमा पठाइएको कम्पनीले जनाएको छ ।
सचिवालय बैठकमा सहभागि हुन नेताहरु त्यसतर्फ जादै थिए । सिराहा धनगढीमाई नगरपालिका–४, सर्रे अम्वासमा रहेको चौथौँ महाधिवेशन स्थलमा सचिवालय बैठक बस्न लागेको हो ।
