काठमाडौँ । गणपूरक सङ्ख्या नपुगेपछि प्रतिनिधि सभा बैठक स्थगित गरिएको छ ।
मंगलबार बसेको बैठकमा प्रधानमन्त्रीको सवाल-जवाफसम्म सांसदहरूको राम्रै उपस्थिति रहेपनि ‘केही नेपाल ऐनलाई संशोधन गर्न बनेको विधेयक २०८०’माथिको सैद्धान्तिक छलफल गर्ने क्रममा आवश्यक पर्ने एक चौथाइ सङ्ख्यासमेत नपुगेपछि स्थगित गरिएको हो ।
सभामुखले ‘केही नेपाल ऐनलाई संशोधन गर्न बनेको विधेयक २०८०’लाई निर्णयार्थ प्रस्तुत गर्न लागेपछि रास्वपा सांसद सुमना श्रेष्ठले नियमापत्ति जनाउँदै गणपूरक सङ्ख्या नपुग्ने भन्दै सांसदहरूको गणना गर्न माग गरेकी थिइन् । यस्तै एमाले सांसद दामोदर पौडेल वैरागीले पनि गणपूरक सङ्ख्या नपुग्ने बताएका थिए ।
पछि गणना गर्दा सांसद सङ्ख्या कम्तीमा ६९ जना हुनुपर्नेमा ५९ जना मात्र भएपछि बैठक एक सातालाई स्थगित गरिएको हो । सभामुखले बैठक भदौ १८ गते दिनको १ बजे बस्ने गरी बोलाएका छन् ।
