एजेन्सी । भारतले चौथो टि२० आई खेलमा घरेलु टोली वेस्ट इन्डिजलाई पराजित गरेको छ । ओपनर यशस्वी जैसवाल र शुभमन गिलको कीर्तिमानी ब्याटिङमा भारतले वेस्ट इन्डिजलाई ९ विकेटले हराउदै शानदा। जित हात पारेको हो । यससँगै पाँच टि२० आई खेलको सिरिज २-२ को बराबरीमा पुगेको छ ।
जितको लागि वेस्ट इन्डिजले दिएको १ सय ७९ रनको मध्यम विजयी लक्ष्य भारतले १७ ओभरमा १ विकेट गुमाउँदै पूरा गर्यो । भारतको जितमा यशस्वी जैसवाल ८४ रनमा नटआउट रहे । उनले ५१ बलमा ११ चौका र ३ छक्का प्रहार गरे ।
अर्का ओपनर शुभमन गिलले पनि अर्धशतकीय ईनिङ खेले । उनले ४७ बलमा ३ चौका र ५ छक्कासहित ७७ रन बनाए । पहिलो विकेटका लागि गिल र जैसवालले १ सय ६५ रनको साझेदारी गरेका थिए ।
भारतीय टि२० आईमा ओपनरले गरेको यो साझेदारी हालसम्म कै उच्च हो । २०१७ मा श्रीलंकाविरुद्ध रोहित शर्मा र लोकेश राहुलले पहिलो विकेटका लागि १ सय ६५ रनको साझेदारी गरेका थिए ।
त्यसअघि टस जितेर पहिला ब्याटिङ रोजेको वेस्ट इन्डिजले निर्धारित २० ओभरमा ८ विकेट गुमाउदै १ सय ७८ रन बनाएको थियो । वेस्ट इन्डिजको लागि शिम्रन हेटमायरले सर्वाधिक ६१ रनको योगदान दिएका थिए ।
यस्तै, शाई होपले ४५ रन जोड्दा वेस्ट इन्डिजका अन्य कुनैपनि ब्याटरले राम्रो प्रदर्शन गर्न सकेनन् । ओपनर कायल मेयर्स १७, बे्रन्डन किंग १८, कप्तान रोभम्यान पावेल १, रोमारियो शेफर्ड ६, ओडियन स्मिथ १५ र अकिल हुसैनले ५ रन बनाएर आउट भए ।
भारतको लागि स्पिनर कुलदीप यादबले २ विकेट लिए । युजभेन्द्र चाहल, मुकेश कुमार र अक्षर पटेलले समान एक एक विकेट लिए ।
सिरीजको पाँचौं तथा निर्णायक खेल आज राती हुनेछ ।
