काठमाडौं । प्रधानमन्त्री केपी शर्मा ओलीले नेपाली कांग्रेसलाई कसले गरेको चुनावमा भाग लिने भन्द्रै प्रतिप्रश्न गरेका छन् । आइतवार वालुवाटारमा पत्रकार सम्मेलन गर्दै प्रधानमन्त्री ओलीले ओलीको नेतृत्वमा चुनावमा जाँदैनौ भन्ने कांग्रेस नेताहरूको भनाइ सुन्दा आफूलाई आश्चर्य लागेको उनले बताएका हुन् ।
ओलीले आफ्नो सरकारको नेतृत्वमा मात्र चुनाव गर्नुपर्छ भन्ने ढिपी छाड्न समेत कांग्रेसलाई सुझाव दिएका हुन्। आफूलाई प्रजातन्त्रवादी भन्ने पार्टी प्रचण्डपथ अंगीकार गरेर कुदेजस्तो देखिएको उनले बताएका हुन् ।
‘आफूलाई प्रजातान्त्रिक शक्ति भन्ने कांग्रेसका सचेतक (पुष्पा भुसाल)ले बोलेको हिजो सञ्चार माध्यममा हेरें । केपी ओलीले गराएको चुनावमा भाग लिँदैन भन्नुभयो, उहाँले । फलानाले गरेको चुनाव भाग नलिने ? कसले गरेको चुनावमा भाग लिनुपर्ने ? भाग लिन नेपाली काँग्रेसले टिको लगएको सरकार चाहिने हो ?’ ओलीले प्रश्न गरे, ‘अहिलेको प्रधानमन्त्री सबैभन्दा बढी पपुलर भोट भएको पार्टी, दुईवटा पार्टी मिलाउँदा पनि एक्लै ठूलो पार्टीको नेतृत्वमा चुनावमा नजाने ? कुन डेमोक्रेसीको परिभाषा, कुल लोकतान्त्रिक अभ्यास र आचरणमा पर्छ ? मलाई नेपाली कांग्रेसको बोली सुनेर आश्चर्य लागेको छ । आफ्नै नेतृत्वमा चुनाव हुन्छ भनेको के हो ?’
ओलीले एमालेका केही तत्वलाई उकासेर, केही सही गराएर र केही किर्ते सही गराएर राष्ट्रपतिकोमा हस्ताक्षर बुझाइएको आरोप लगाए ।
