काठमाडौँ । मिटरब्याजविरुद्धको कानून पारित गराउन माग गर्दै मिटरब्याज पीडितहरूले प्रदर्शन गरेका छन् । मिटर ब्याज विरुद्धको संघर्ष समिति, नेपालको आयोजनामा पीडितहरू र्यालीसहित नयाँ बानेश्वर पुगेर संघीय संसद् भवन घेराउ गर्दै विरोध प्रदर्शन गरेका हुन् ।
उनीहरुले नेकपा (एमाले), राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) का कारण मिटरब्याजी नियन्त्रणका लागि ल्याइएको अध्यादेश निष्क्रिय बनेको भन्दै आक्रोश व्यक्त गरेका छन् ।
प्रधानमन्त्रीको अभिव्यक्तिलाई लिएर प्रमुख प्रतिपक्षी दल नेकपा एमालेलगायत रास्वपा र राप्रपाले संसद् अवरुद्ध पारेपछि मिटर ब्याजी नियन्त्रणका लागि ल्याइएको अध्यादेश निष्क्रिय बनेको थियो ।
प्रदर्शनका क्रममा उनीहरूले तीन पार्टीमाथि सामन्तको मतियार बनेको आरोप लगाएका थिए । प्रदर्शनका क्रममा उनीहरूले ‘सुदखोर महाजनलाई कारबाही गर’, ‘चैत १८ गतेको सहमति लागु गर जस्ता नारा लगाएका थिए ।
