काठमाडौं । काठमाडौं महानगरपालिकाले आर्थिक वर्ष (२०८०/८१ ) का लागि २५ अर्ब ५४ करोड ७८ लाख २० हजार रुपैयाँ बजेट विनियोजन गरेको छ ।
आइतबार नगरसभाको बैठकमा बजेट प्रस्तुत गर्दै कामपाका उपमेयर सुनीता डंगोलले चालुतर्फ ८ अर्ब ६१ करोड ५३ लाख २८ हजार र पुँजीगततर्फ १६ अर्ब ९३ करोड २४ लाख ९२ हजार रुपैयाँ विनियोजन गरिएको बताएकी हुन् ।
कामपाले चालुतर्फ कुल बजेटको ३३.७२ र पुँजीगततर्फ ६६.२८ प्रतिशत बजेट छुट्याएको छ । महानगरको बजेटमा सबैभन्दा ठूलो स्रोत बैंक मौज्दात ११ अर्ब ७५ करोड रुपैयाँ रहेको छ ।
उपमेयर डंगोलको अनुसार संघीय सरकार र प्रदेश सरकारको सशर्त अनुदान १ अर्ब ४५ करोड ६२ लाख, निशर्त अनुदान ८९ करोड ३६ लाख, आन्तरिक आय ६ अर्ब ३९ करोड, राजस्व बाँडफाँटबाट २ अर्ब १६ करोड रुपैयाँ र सामाजिक सुरक्षा र जग्गा एकीकरणबाट २ अर्ब रुपैयाँ प्राप्त हुनेछ ।
यस्तै कामपाले १० विषयगत क्षेत्रका महानगर गौरवको योजनाका लागि ३ अर्ब ८० करोड रुपैयाँ विनियोजन गरेको छ । महानगरले स्वर्णिम योजना अन्तर्गत २५ वटा विषयगत क्षेत्रका योजनाका लागि २ अर्ब विनियोजन गरिएको छ ।त्यसैगरी, महानगरले वडाबाट प्राप्त योजनालाई प्राथमिकतामा राखी त्यसका लागि १ अर्ब ७६ करोड रुपैयाँ विनियोजन गरेको छ ।
कामपाले सबैभन्दा धेरै शिक्षामा ७ अर्ब ३४ करोड रुपैयाँ विनियोजन गरेको छ भने स्वास्थ्य क्षेत्रका लागि ९२ करोड रुपैयाँ विनियोजन गरेको छ ।
काठमाडौं-महानगरको-बजेट
