काठमाडौँ । जिल्ला प्रहरी परिसर ललितपुरले चोरीका तीन थान मोटरसाइकल सहित एकजनालाई पक्राउ गरेको छ । पक्राउ पर्नेमा मकवानपुरगढी गाउँपालिका–१ का गणेश घलान रहेका छन् ।
गत जेठ २९ गते बिहान २ बजे गोदावरी नगरपालिका–१२ ठेचोमा पार्किङ गरिराखेको बा९५प६०७० नम्बरको बजाज पल्स–२२० सिसीको मोटरसाइकल चोरी भएको सूचना पाएपछि प्रहरीले बागमती गाउँपालिका–३ छपेलीस्थित कान्तिलोकपथ सडकखण्डमा चेकप्वाइन्ट राखेर सवारी जाँच गरेको थियो ।
जाँचका क्रममा बिहान ३ बजेतिर चापागाउँबाट बगुवातर्फ तीनवटा मोटरसाइकल चलाएर लिई जाँदै गरेका व्यक्तिहरूलाई चेकजाँचका लागि रोक्न खोज्दा चेकप्वाइन्टमा नरोकी तीव्रगतिमा दुईवटा मोटरसाइकल बगुवातर्फ भागेको प्रहरीले जनाएको छ ।
एउटा मोटरसाईकल फर्काएर चापागाउँतर्फ जान खोज्दा पिछा गर्दै जाने क्रममा बिहान साढे ३ बजे बागमती–३ छपेलीस्थित कान्तिलोकपथ सडक खण्डमा बागमती प्रदेश ०२–०२६ प ५३७१ नम्बरको पल्सर–१५० सिसीको मोटरसाइकलसहित घलानलाई प्रहरीले पक्राउ गरेको थियो ।
कान्तिलोकपथ सडक खण्डमा मोटरसाइकल छोडी भाग्ने क्रममा लडी घाउचोट लागी घाइते भएको अवस्थामा फेला परेका घलानलाई उपचारार्थ पाटन अस्पतालमा पठाएर स्वास्थ्यलाभपछि यही असार २ गते अस्पतालबाट डिस्चार्जभएपछि निजलाई कानुन बमोजिम नियन्त्रणमा लिइएको जिल्ला प्रहरी परिसर ललितपुरले जनाएको छ ।
त्यस्तै बगुवातर्फ भागी फरार भएका मोटरसाइकललाई पिछा गर्दै जाने क्रममा अन्दाजी करिब सवा पाँच बजेतिर बाग्मती–२ बगुवा स्थित कान्तिलोकपथमा चाबीसहितको बाग्मती प्रदेश ०३–००५ प ६१८७ र बा९५प ६०७० नम्बरको पल्सर २२० सिसीको मोटरसाईकल बेवारिसे छाडिएको अवस्थामा फेला परेको थियो ।
तीनवटै मोटरसाइकल चोरी भएको घटनामा संलग्न घलानलाई ललितपुर जिल्ला अदालतबाट पहिलो पटकलाई ५ दिनको म्याद अनुमति लिई थप अनसुन्धान जारी रहेको प्रहरीले जनाएको छ।
