काठमाडौँ । नेकपा(माओवादी केन्द्र)का सांसद देवेन्द्र पौडेलले भ्रष्टाचार नियन्त्रणका लागि सबै राजनीतिक दलहरुले साझा संकल्प गर्नुपर्ने बताउनुभएको छ ।
सोमवारको प्रतिनिधि सभा बैठकको विशेष समयमा बोल्दै सांसद पौडेलले भ्रष्टाचार नियन्त्रणका लागि सबै राजनीतिक दलहरु साझा संकल्पका साथ अगाडी बढ्नु जरुरी रहेको बताउनुभएको हो । उहाँले भ्रष्टाचारको विषय सत्तापक्ष र विपक्षको विषय नभएर आम नागरिकको साझा विषय भएकाले यसलाई नियन्त्रण गर्नु साझा दायित्व भएको बताउनु भयो । उहाँले एक अर्कालाई आरोप प्रत्यारोप नगरी छानविनलाई निस्कर्षमा पुर्याउन सम्बन्धित निकायलाई सबैले सहयोग पुर्याउनुपर्ने धारणा राख्नुभयो ।
उहाँले भन्नुभयो – ‘नेपाली नागरिकलाई विदेशी बनाएर अर्को देशमा पठाउने गम्भिर प्रकारको घटना सार्वजनिक भएको छ । यो घटनामा कतिपय माननीयले यहाँ सरकारको बारेमा प्रश्न उठाउनु भएको छ । मैले त सरकारलाई हार्दिक धन्यवाद दिन चाहन्छु, राम्रो काम गरेको बेलामा इमान्दारितापूर्वक समर्थन गर्न डराउनु हुँदैन । भ्रष्टाचारको विषय पक्ष र प्रतिपक्षको विषय होइन ।
नेपालको नागरिकहरुको साझा विषय हो । के नेपाल सुशासन नभएको देश हो ? के न्याय लुटिएको देश हो ? के कानून मरेको देश हो ? जिम्मेवारी समाप्त भएको देश हो ? दायित्व गुमनाम भएको देश हो ? जवाफदेहिता नभएको देश हो र ? यदी यि विषयहरुको प्रत्याभुति दिलाउने देशको रुपमा हामी परिचित हुनुछ भनेदेखि भ्रष्टाचारको यो अभियानमा हामी साझा संकल्पका साथ अगाडी बढ्नु जरुरी छ । आरोप प्रत्यारोप होइन । एउटा विषयको छानबिन चलिराखेको बेलामा, अर्को विषय उठाइदिएर, सम्पूर्ण माननीयज्युहरुसँग म विशेष अनुरोध गर्न चाहन्छु, त्यसप्रकारले विषयान्तर नगरौँ । भूटानी शरणार्थीको विषय गम्भिरतापूर्वक उठेको छ । सत्यतथ्यलाई निस्कर्षमा पुर्याउनको निम्ति सरकारलाई सम्बन्धित निकायहरुलाई सहयोग पुर्याउनुपर्ने यतिबेलाको हामी सबैको साझा कर्तव्य र दायित्व हो ।’
उहाँले अख्तियार दुरुपयोग अनुसन्धान आयोग, राजस्व अनुसन्धान विभाग, सम्पती शुद्धीकरण विभागजस्ता राज्यका निकायहरु सुस्ताएर बस्नु नहुने पनि बताउनु भयो ।
