काठमाडौं । नेकपा एमालेका सांसद गोकुल बास्कोटाले अध्यक्ष केपी शर्मा ओलीको हत्या गर्न खोजेको हो भन्दै प्रश्न गरेका छन् ।
शुक्रबार प्रतिनिधिसभाको बैठकमा बोल्दै उनले झापा घटनामा गृहमन्त्रीलाई समेत जानकार भई सरकार मौन बसेको आरोप लगाए ।
‘गृहमन्त्रीले झापा घटनाको बारेमा संवेदनशील भएको जनाउँ त दिनुभयो । तर, सोध्न चाहन्छु त्यो घटना हुँदैछ भनेर गृहमन्त्रीलाई थाहा छ । सभामुखको च्याम्बरमा प्रतिपक्षी दलले आफूले पाएको सूचना शेयर गरेको छ । सरकारको नियत र उद्देश्य के ?’, उनले भने ।
सांसद बास्कोटाले प्रदेश १ को नामकरण ओलीले नभएर प्रदेशसभाले गरेको प्रष्ट पारे । उनले भने, ‘केपी ओली एमालेको अध्यक्षमात्र होइन । यो मुलुकको दुई–दुईपटकको पूर्वप्रधानमन्त्री हो । उहाँको ऐतिहासिक योगदान छ । अब यो देशको अर्को मान्छेले चीनसँग अर्को सम्झौता गर्नुपर्दैन । त्यसका निम्ति अर्को कदम उठाउनु पर्दैन । के उहाँको हत्या गराउन खोजेको हो ?’
उनले प्रधानमन्त्रीको पार्टीले मान्छेले अन्तर्राष्ट्रिय जाति हुनेछ भनेर गीत गाउँदै हिँडेको टिप्पणी गरे । ‘बाहुन भेटे बाम्सालिङ, तामाङ भेटे ताम्लासिङ, नेवार भेटे नेवाः, गुरुङ भेटे तमुवान भन्दै हिँडेको परिणाम आज आफ्नै कार्यकर्ता सम्हाल्न सक्नुभएन । नेपाल बहुभाषिक, बहुसांस्कृतिक देश हो ।’, उनले भने, ,हिजो धतुरो रोप्नुभएको थियो, आज सुन्तला फलेन ।’
