मकवानपुर । हेटौंडामा भोलि (शनिबार) ‘हेटौंडा साइकल रन’ आयोजना हुने भएको छ । नगरवासीलाई साइकलको प्रयोग प्रति अभिरुचि बढाउने उद्धेश्यले हेटौंडा उपमहानगरपालिकाले ‘साइकल रन’ प्रतियोगिता गर्न लागेको हो ।
प्रतियोगितामा उपमहानगरका १९ वटै वडामा बसोबास रहेका १८ देखि ६० वर्षसम्मका व्यक्ति सहभागी हुन पाउनेछन् । युवा तथा खेलकुद शाखा प्रमुख बसन्त सिटौलाले हालसम्म अनलाइन फारमबाट ७० जनाले नाम टिपाएको बताउनुभयो । यस प्रतियोगितामा एक सयजना भन्दा धेरै पनि सहभागी हुन पाउने उहाँले बताउनुभयो ।
नगर खेलकुद विकास समितिको व्यवस्थापनमा हुने कार्यक्रममा सहभागीहरुले २५ किलोमिटरसम्म साइकल कुदाउनुपर्नेछ । हुप्राचौर–पिप्ले –चौघडा–हटिया–कमाने–गर्दोई–भैरबरोड हुँदै पुन स् हुप्राचौरमा आएर साइकल रन टुंग्याउनुपर्ने नियम राखिएको छ । साइकल रनमा सहभागी हुन सहभागीले आफुलाई आवश्यक पर्ने साइकल, हेल्मेट र जुत्ता लगायत सामाग्री आफैं जुटाउनुपर्ने समिति अध्यक्ष चन्द्र शाहीले जानकारी दिनुभयो । उक्त कार्यक्रममा महिलारपुरुष दुबै सहभागी हुन पाउने अध्यक्ष शाहीले जानकारी दिनुभयो ।
खेलकुद शाखा प्रमुख सिटौलाका अनुसार राजमार्गमा हुने साइकल रन कार्यक्रमका सहभागीले आफ्नो सुरक्षालाई ध्यानमा राखेर साइकल चलाउन आग्रह गर्नुभयो । सम्भावित दुर्घटना हुन नदिन जिल्ला प्रहरी र ट्राफिक प्रहरी कार्यालयसंग आवश्यक समन्वय गरिसकेको उहाँले बताउनुभयो ।
‘साइकल रन’ कार्यक्रममा प्रथम हुनेले नगद ५० हजार रुपैयाँ, दोस्रो हुनेले ३० हजार रुपैयाँ, तेस्रो हुनेले २० हजार रुपैयाँ र प्रोत्साहन पुरस्कार स्वरुप १०/१० हजार दुई जनालाई प्रदान गरिने आयोजकले जनाएको छ ।
कार्यक्रममा सहभागीहरुले भोलि विहान ६ः४५ बजेसम्म पनि नाम दर्ता गर्न सकिने जनाएको छ । कार्यक्रमको उद्धघाटन उपमहानगरपालिका प्रमुख मिना कुमारी लामाले गर्नुहुनेछ । कार्यक्रमका लागि चार लाख बजेट छुट्याइएको छ ।
