काठमाडौँ । नेपाली राष्ट्रिय महिला फुटबल टोलीले ‘महिला ओलम्पिक फुटबल प्रतियोगिता, पेरिस २०२४’ का लागि एसियन छनोटअन्तर्गत पहिलो चरणको खेलमा भियतनामसँग खेल्ने भएको छ ।
अखिल नेपाल फुटबल संघ (एन्फा)का अनुसार चैत अन्तिम साता नेपालले घरेलु मैदानमा दुई खेल खेल्नेछ ।
एन्फाको आयोजनामा हुने प्रतियोगिता २२ र २५ चैतमा आयोजना गर्न लागिएको हो । नेपाल र भीयतनामबीचको पहिलो खेल अप्रिल ५ अर्थात २२ चैतमा हुँदा दोस्रो खेल अप्रिल ८ अर्थात २५ चैतमा हुनेछ ।
दुबै खेल दशरथ रंगशालामा साँझ ६ बजे हुनेछ । प्रतियोगिताका लागि सहभागी हुन भियतनामको राष्ट्रिय महिला टोली ३ अप्रिलमा काठमाडौँ आइपुग्ने एन्फाले जनाएको छ । उक्त प्रतियोगिताका लागि नेपाली राष्ट्रिय महिला टोली हाल बन्द प्रशिक्षणमा रहेको छ ।
प्रतियोगिताको लागि एन्फाले साधारण प्यारापिटतर्फ ३०० रुपैयाँ र भीआइपी प्यारापिटतर्फ १००० रुपैयाँको टिकट मूल्यसमेत निर्धारण गरेको छ ।
