काठमाडौँ । नेपाल नागरिक उड्डयन प्राधिकरण (क्यान) ले भारतीय ध्वजाबाहक वायुसेवा एयर इन्डियाको विमान चालक दललाई नेपालमा हुने उडानमा प्रतिबन्ध लगाएको छ ।
सिमरामाथि १९ हजार फिट उचाइमा फन्को लगाइरहेको (होल्डिङमा रहेको) एयर इन्डियाको विमान ३७ सय फिट तल झारिएको घटनामा संलग्न रहेको भन्दै तत्कालका लागि उक्त विमानका चालक दलका सदस्यलाई नेपालमा हुने उडानमा प्रतिबन्ध लगाइएको क्यानले जनाएको छ ।
क्यानले उक्त घटनामा संलग्नलाई कारबाही गर्न भारतीय नागरिक उड्डयन कार्यालय (डीजीसीए इन्डिया)लाई पत्राचार गर्ने समेत जनाएको छ ।
घटना गत शुक्रबार भएको थियो । उक्त विमान त्रिभुवन अन्तर्राष्ट्रिय विमानस्थलमा अवतरण भएपछि क्यानले विमानका चालकलाई सोधपुछसमेत गरेको थियो । चालकहरुले गल्ती भएको भन्दै माफी मागेका थिए ।
घटना भएको दिन उक्त जहाजलाई हेर्ने काठमाडौँ टावरअन्तर्गत रहेको कन्ट्रोल टावरमा रहेका तीन जना एयर ट्राफिक कन्ट्रोलर ९एटीसी० लाई पनि कारबाही गरिएको जनाइएको छ ।
शुक्रबार बिहान पौने नौ बजे मलेसियाबाट आएको नेपाल वायुसेवा निगमको न्यरोबडी विमान सिमरामाथि १५ हजार फिट उचाइमा फन्को लगाइरहेका बेला त्यो विमानमाथि १९ हजार फिटमा फन्को लगाइरहेको एयर इन्डियाको विमान एक्कासि १५ हजार ३ सय फिटमा झरेको थियो ।
दुवै जहाज आमनेसामने भएपछि दुवैको ककपिटमा ‘ट्राफिक अलर्ट’ ले सावधानी गराएको थियो ।
