काठमाडौँ । आजदेखि सुरु भएको प्रधानमन्त्री थ्री नेसन्स फुटबल प्रतियोगितामा नेपालले लाओसलाई पराजित गरेको छ । त्रिपुरेश्वरस्थित दशरथ रङ्गशालामा बुधबार भएको उद्घाटन खेलमा नेपालले लाओसलाई २–० गोलअन्तरले पराजित गरेको हो ।
नेपालको जितमा अनन्त तामाङ र नवयुग श्रेष्ठले एक–एक गोल गरे । अनन्तले खेलको पहिलो हाफमा गोल गरे भने नवयुगले खेलको दोस्रो हाफमा गोल गरेका हुन् । खेलको ३०औँ मिनेटमा अनन्तले नवीन लामाको पासमा हेडमार्फत गोल गर्दै नेपाललाई सुरुवाती अग्रता दिलाएका थिए ।
त्यसपछि खेलको ५६औँ मिनेटमा नवयुगले गोल गर्दै नेपालको अग्रता दोब्बर पारे । उनले करिब ३५ यार्डबाट प्रहार गरेको बलले सिधै जाली चुमेको थियो । त्यसपछि खेलमा गोल हुन सकेन र नेपालले लाओसविरुद्ध २–० को सहज जित हासिल गर्यो । खेलमा नेपालका अनन्त तामाङ म्याच अफ द म्याच घोषित भए ।
प्रतियोगितामा आयोजक नेपालसहित भूटान र लाओस गरी तीन राष्ट्र सहभागी छन् । यही चैत १७ गतेसम्म चल्ने उक्त प्रतियोगिताको विजेता टोलीले पाँच हजार अमेरिकी डलर प्राप्त गर्नेछ भने उपविजेता हुने टोलीले तीन हजार अमेरिकी डलर पाउनेछ । प्रतियोगिताको उत्कृष्ट खेलाडीले पाँच सय अमेरिकी डलर र खेलको म्यान अफ दि म्याच घोषित हुने खेलाडीले २५० डलर पाउने छन् ।
उक्त प्रतियोगिताअन्तर्गत नेपालले अब दोस्रो खेल यही चैत १४ गते भूटानसँग खेल्नेछ । त्यसअघि लाओस र भूटानबी चैत ११ गते प्रतिस्पर्धा हुनेछ । फाइनल खेल १७ गते हुनेछ ।
