काठमाडौँ । आगामी चैत ३ गते हुन गइरहेको उपराष्ट्रपतिको निर्वाचनका लागि उम्मेदवारी दिएका चार जनाको उम्मेदवारी कायम भएको छ ।
राष्ट्रपतिमा रामचन्द्र पौडेल निर्वाचित भइसकेको अवस्थामा उपराष्ट्रपतिमा पनि पुरुष उम्मेदवार कायम हुन नसक्ने भन्दै रामसहाय प्रसाद यादवको उम्मेदवारीविरुद्ध शनिबार एमालेकी अष्टलक्ष्मी शाक्य र जनमत पार्टीकी ममता झाले उजुरी दिएका थिए ।
तर, निर्वाचन आयोगले उपराष्ट्रपतिमा जनता समाजवादी पार्टीका नेता यादवको उम्मेदवारी पनि कायम राखेको हो ।
आइतबार अपरान्ह राष्ट्रपति तथा उपराष्ट्रपति निर्वाचन कार्यालयका मुख्य निर्वाचन अधिकृत महेश शर्मा पौड्यालले उम्मेदवारको अन्तिम नामावली प्रकाशन गरेका छन् । जसमा शनिबार उम्मेदवारी दिएका चारैजना अष्टलक्ष्मी शाक्य, रामसहायप्रसाद यादव, प्रमिला कुमारी र ममता झाको नाम समावेश छ ।
नेकपा(एमाले)का तर्फबाट उपाध्यक्ष शाक्य, १० दलीय सत्तारुढ गठबन्धनकातर्फबाट जनता समाजवादी पार्टी नेपालका रामसहायप्रसाद यादव र प्रमिला यादवले तथा जनमत पार्टीको तर्फबाट ममता झाले उम्मेदवारी दिएका छन् ।
