काठमाडौँ । राष्ट्रिय प्रजातन्त्र पार्टी (राप्रपा) ले केन्द्रीय कार्यसम्पादन समितिको बैठक बोलाएको छ । आसन्न राष्ट्रपति निर्वाचनबारे निर्णय लिन राप्रपाले बैठक बोलाएको हो । राप्रपाभित्र राष्ट्रपति निर्वाचनमा भाग लिनुपर्ने र बहिष्कार गर्नुपर्ने नेताहरुले आ–आफ्नो धारणा सार्वजनिक गर्दै आएका छन् ।
सरकारमा पार्टी अध्यक्ष राजेन्द्र लिङ्देनसहितका नेताहरु सहभागी छन् । पार्टीमा राष्ट्रपति निर्वाचनमा भाग लिने वा नलिनेबारे निर्क्योल भइनसकेको बताइएको छ । कार्यसम्पादन समितिले यसबारे निर्णय लिनेछ ।
केन्द्रीय कार्यसम्पादन समितिको बैठक राष्ट्रपति मनोनयनको एक दिन अघि शुक्रबार दिउँसो साढे १२ बजे बस्ने तय भएको पार्टी प्रवक्ता मोहन श्रेष्ठले जानकारी दिनुभयो । उहाँका अनुसार राप्रपाले आफ्नो उम्मेदवार राष्ट्रपतिमा नउठाउने तर कुन उम्मेदवारलाई समर्थन गर्ने भन्ने विषयमा सोही दिन छलफल हुने उनले बताउनुभयो ।
