एजेन्सी । भारतको उत्तर प्रदेशस्थित कुशीनगर जिल्लामा बुधबार राति कहालीलाग्दो घटना भएकाे छ । जिल्लाको नेबुआ नौरंगिया थाना इलाकाको नौरंगिया गाउँमा वैवाहिक कार्यक्रममा बुधबार राति भएको घटनामा १३ जनाको मृत्यु भएको छ। मृत्यु हुनेमा महिला, किशोरी र बच्चाहरु रहेका छन्। समारोहको क्रममा इनारको स्लाब भाँचिएर उक्त दुर्घटना हुन पुगेको हो। एक दर्जनभन्दा बढी गम्भीर रुपमा घाइते भएका छन् भने उनीहरुलाई अस्पताल भर्ना गरिएको छ।
भारतीय सञ्चारमाध्यमका अनुसार बुधबार राति हल्दीको समारोहकाबीच अचानक इनारको स्लाब भाँचिन पुग्यो र २५ भन्दा बढी महिला, किशोरी र बच्चाहरु इनारमा खस्न पुगे। मृतकमध्ये दुई जनाको पहिचान खुल्न सकेको छैन। बिहे घरमा चिच्चाहट र सहयोगको पुकार मच्चियो। खबर पाउनासाथ प्रहरी र स्थानीय मिलेर उद्धारमा लागेर इनारबाट सबैलाई निकालियो। गाउँदेखि जिल्ला अस्पतालसम्म हाहाकार मच्चिएको छ। भारतीय सञ्चारमाध्यमका अनुसार नौरंगिया गाउँको स्कुल टोल निवासी परमेश्वर कुशवाहका छोरा अमित कुशवाहाको विवाह भन्दा पहिले बुधबार अबेर रातसम्म हल्दी समारोह चलिरहेको थियो।
घरबाट १०० मिटर टाढा रहेको इनार नजिकै विवाह भन्दा पहिले गरिने समारोह(मटकोड)को कार्यक्रम चलिरहेको थियो। उक्त समारोह नजिक रहेको त्यस इनारमा आरसीसी स्ल्याब बनाएर ढाकिएको थियो। समारोहको क्रममा ठूलो संख्यामा महिला, युवती र बच्चाहरु इनारको स्ल्याबमाथि उभिँदा स्ल्याब अचानक भाँचिन पुग्यो र त्यसमाथि रहेका सबैजना इनारमा खस्न पुगे। इनारमा पानी टनाटन थियो। घटनापछि हाहाकार मच्चियो।
आसपासका मानिसहरु उद्धारमा खटिएपनि अँध्यारो भएको कारण उद्धारमा कठिनाई हुन पुग्यो। खसेकालाई इनारबाट उद्धार गरी अस्पताल पुर्याइयो। चिकित्सकले १३ जनालाई मृत घोषणा गरे। उद्धारबाट २५ जनालाई इनारबाट बाहिर निकालिएको थियो। घाइतेहरुलाई अस्पताल भर्ना गरिएको छ भने धेरैको अवस्था गम्भीर रहेको भारतीय सञ्चारमाध्यमले उल्लेख गरेको छ।
