काठमाडौँ । चर्चित गायिका एलिना चौहान यतिबेला एक अन्तर्वार्ताका कारण चर्चामा आएकी छन् ।
आइतबार टेलिभिजन कार्यक्रम ‘द प्रकाश सुवेदी शो’ मा अतिथिको रूपमा सहभागी भएकी उनलाई कार्यक्रमका होस्ट प्रकाश सुवेदीले रवि लामिछानेको तस्बिर देखाएर कुन रूपमा चिन्नुहुन्छ भनेर प्रश्न गरेका थिए ।
त्यसको जवाफमा गायिका चौहानले व्यक्ति रवि लामिछाने भए पनि कुनै पनि रूपमा नचिन्ने प्रतिक्रिया दिएकी थिइन् ।
मिडियाकर्मीदेखि पछिल्लो समय राजनीतिक र नागरिकताको विषयले चौतर्फि चर्चामा रहेका रविलाई चिन्दिन भनेपछि अहिले सामाजिक सञ्जालमा उनी ट्रोल बनिरहेकी छन् ।
एक प्रयोगकर्ताले टिकटकमा उनलाई गाइने भएर मात्र भएन, देशलाई चाहिने मानिस चिनिराख्नुपर्छ भनेर व्यङ्ग्य गरेका छन् ।
कतिले उनको फोटोसँग विभिन्न पोस्ट गर्दै उडाइरहेका छन् । कार्यक्रमको सुरुमा सुवेदीले रविको चर्चा पनि गरेका छन् । तरपछि फोटो देखाएर कुन रूपमा चिन्नुहुन्छ भन्दा कुनै रूपमा चिन्दिन भनेपछि उनी आलोचित बनेकी हुन् ।
एलिना पछिल्लो समय गीत ‘धोकेबाज’को कारणले चर्चामा छिन् । उनले विभिन्न स्थानमा दिएको प्रस्तुतीमा उक्त गीत गाएर युवायुवती मरिहत्ते गरेको भिडियोहरू सामाजिक सञ्जाल टिकटक लगायतमा भाइरल भइरहेका छन् ।
