काठमाडौं । अर्थमन्त्री विष्णु पौडेलले विश्व अर्थतन्त्रमा देखिएका कसिला नीतिले नेपालको अर्थतन्त्रमा थप चुनौती थपिएको बताएका छन् ।
आइतबार प्रतिनिधि सभाको बैठकलाई सम्बोधन गर्दै अर्थमन्त्री पौडेलले आयात नियमनको असर र आपूर्तिमा आएको सुस्तताका कारण राजस्व संकलनमा दबाब परेकोले अर्थतन्त्रमा असर परेको बताएका छन् ।
अर्थमन्त्री पौडेलले राजस्व प्रणालीले अनिवार्य दायित्वमा छुट्याएको रकम समेत नपुग भएको बताएका छन् । यसपटक सरकारले लिएको आर्थिक वृद्धिदरको लक्ष्य हासिल हुननसक्ने उनले बताए । । ‘चालु वर्षको आर्थिक वृद्धिदर ८ प्रतिशत हासिल हुँदैन ।’, उनले भने ।
अर्थमन्त्री पौडेलले चालु आर्थिक वर्ष २०७९/८०को बजेट आकार घटेर १५ खर्ब ५० अर्ब रूपैयाँ हुने अनुमान रहेको बताएका छन् ।
तत्कालीन अर्थमन्त्री जनार्दन शर्माले १७ खर्ब ९३ अर्बको बजेट ल्याएका थिए । चालू आर्थिक वर्षको बजेट समीक्षामार्फत उक्त बजेटको आकार घटाएर १५ खर्बमा झारिएको छ । यस्तै राजस्व संकलनको लक्ष्य पनि घटाएर १२ खर्ब ४४ अर्ब ७५ करोड बनाइएको छ ।
यसअघि १४ खर्ब ३ अर्ब राजस्व संकलनको लक्ष्य लिइएको थियो ।
