कैलाली । सुदूरपश्चिम प्रदेश सरकारका मुख्यमन्त्री कमल शाहले आज शपथ लिने भएका छन् । प्रदेश प्रमुख कार्यालयमा प्रदेश प्रमुख देवराज जोशीले मुख्यमन्त्री शाहलाई दिउँसो ३ः३० बजे पद तथा गोपनीयताको शपथ गराउने कार्यक्रम तय भएको हो ।
मुख्यमन्त्री शाहले आजै २ जना मन्त्रीहरु नियुक्त गर्ने तयारी रहेको छ । नेपाली कांग्रेस र नेकपा एकीकृत समाजवादीबाट एकएक जनालाई आजै मन्त्री नियुक्त गर्ने बताईएको छ । यद्यपी को को मन्त्री बन्ने भन्नेमा अझै पक्का भइसकेको छैन ।
पुस २७ गते मुख्यमन्त्रीमा नियुक्त एमाले संसदीय दलका नेता राजेन्द्र रावलले बिहीबार संसदबाट विश्वासको मत लिन नसकेर पदमुक्त भएपछि राजीनामा बुझाएका थिए ।
मुख्यमन्त्रीमा नियुक्त कांग्रेस संसदीय दलका नेता शाहले पनि संविधानको धारा १६८ को ३ अनुसार ३० दिनभित्र विश्वासको मत लिनुपर्नेछ ।
