काठमाडौँ । दिउँसो डाकिएको सुदूरपश्चिम प्रदेशसभाको बैठक बेलुका ५ बजेसम्मका लागि सरेको छ । मुख्यमन्त्री राजेन्द्रसिंह रावलले विश्वासको मत लिने कार्यसूचीसहित बैठक बिहीबार अपराह्न १ बजे बस्ने तय भएको थियो ।
तर नागरिक उन्मुक्ति पार्टी (नाउपा) ले मुख्यमन्त्री रावललाई विश्वासको मत नदिने बताएपछि बैठक बस्ने समय सारिएको हो । नाउपाका सुदूरपश्चिम प्रदेशसभाका सबै सात सदस्य अहिले काठमाडौँमा छन् । मुख्यमन्त्री रावलले विश्वासको मत लिने आज अन्तिम दिन हो ।
नाउपाले आफ्ना नेता रेशम चौधरीसहित राजबन्दीको रिहाइ वा रिहाइको लिखित प्रतिबद्धता नहुँदासम्म विश्वासको मत नदिने अडान राखेको छ ।
सुदूरपश्चिम प्रदेशसभामा ५३ सदस्य छन् । प्रदेशमा नेकपा (माओवादी केन्द्र) का ११, नेकपा (एमाले) का १०, नाउपाका ७ र राष्ट्रिय प्रजातन्त्र पार्टी (राप्रपा) का १ सदस्य छन् । नाउपाले विश्वासको मत नदिएको अवस्थामा मुख्यमन्त्री रावललाई विश्वासको मत लिन आवश्यक २७ मत पुग्दैन ।
मुख्यमन्त्री रावलले प्रदेशसभाबाट विश्वासको मत हासिल गर्न नसकेको अवस्थामा उहाँ स्वतः पदमुक्त हुनुहुनेछ । उहाँ पदमुक्त भएसँगै संविधानको धारा ६८ (३) अनुसार प्रदेशसभामा सबैभन्दा ठूलो दलको हैसियतमा नेपाली कांग्रेसको नेतृत्वमा सरकार गठन गर्ने मार्ग प्रशस्त हुनेछ ।
