काठमाडौ । सभामुख अग्निप्रसाद सापकोटाले आज बिहान ११ः३० बजे प्रतिनिधिसभा कार्यव्यवस्था परामर्श समितिको बैठक आह्वान गर्नुभएको छ । सभामुख सापकोटाले संसद् भवन, नयाँबानेश्वरमा बिहान ११ः३० बजे समितिको बैठक आह्वान गर्नुभएको संसद् सचिवालयले जनाएको छ । प्रतिनिधिशभाको बैठक दिउसो एक बजे बस्दैछ ।
यसैबीच, सचिवालयले सार्वजनिक गरेको प्रतिनिधिसभाको सम्भावित कार्यसूचीमा एमसीसी सम्झौता अनुमोदनका लागि टेबल गर्ने विषय समावेश भएको छैन । सम्भावित कार्यसूचीमा प्रधानमन्त्री शेरबहादुर देउवाले आदिबासी जनजाती आयोगको तेस्रो वार्षिक प्रतिवेदन पेश कार्यसूचीमा उल्लेख छ ।
यसैबीच सत्ता साझेदार दलबीचको छलफल आज पनि हुदैछ । पटक पटक भएको छलफल सहमतिमा पुग्न नसकेपनि बिहान १० बजे पुन छलफलमा जुट्न लागेका हुन् । प्रधानमन्त्री शेरबहादुर देउवाले एमसिसी प्रधान कार्यालयले यही फागुन १६ गतेभित्र सम्झौता अनुमोदनका निम्ति गरेको आग्रहलाई समयमै पूरा गर्न सहयात्रीदलहरु लाई आग्रह गर्नुभएको छ । तर गठबन्धनमा अन्य दल भने सकारात्मक छैनन् ।
