एजेन्सी । अष्ट्रेलियामा जारी टी–२० विश्वकपको सुपर १२ अन्तर्गत श्रीलंकाले जित निकालेको छ । ब्रिस्बेनको द गाबा स्टेडियममा भर्खरै सम्पन्न खेलमा श्रीलंकाले अफगानिस्तानलाई ६ विकेटले पराजित गरेको हो ।
श्रीलंकाका धनञ्जय डी सिल्भा ४२ बलमा ६६ रनसहित अविजित रहे । कुशल मेन्डीसले २७ बलमा २५, भानुका राजापाक्षले १४ बलमा १८ रनको योगदानी दिए । अफगानिस्तानका राशिद खान र मुजीब रेहमानले दुई–दुई विकेट लिए ।
त्यसअघि टस जितेर पहिले ब्याटिङमा उत्रिएको अफगानिस्तानले २० ओभरमा ८ विकेटको क्षतिमा १४४ रन बनाएको थियो । अफगानिस्तानका लागि रहमानुल्लाह गुर्वाजले २४ बलमा २८, उस्मान घानीले २७ बलमा २७ रन, इब्राहिम जाड्रानले १८ बलमा २२ रन जोडे ।
श्रीलंकाका वानिन्दु हसरांगाले ३ विकेट लिए भने लाहिरु कुमाराले दुई तथा कासुन रजिथा र धनञ्जय डी सिल्भाले एक–एक विकेट लिए ।
