पोखरा । नवौँ राष्ट्रिय खेलकुद प्रतियोगिताअन्तर्गत एथलेटिक्सको पुरुष १० हजार मिटर दौडमा विभागीय टोली त्रिभुवन आर्मी क्लबका दीपक अधिकारीले राष्ट्रिय कीर्तिमानसहित स्वर्ण पदक जितेका छन् ।
पोखरा रङ्गशालामा आज भएको खेलमा उनले ३० मिनेट १० दशमलव ३० सेकेन्डमा निर्धारित दूरी पार गर्दै स्वर्णपदक जितेका हुन् । दीपकले एपीएफ क्लबका गोपीचन्द्र पार्कीको कीर्तिमानलाई तोड्दै नयाँ कीर्तिमान कायम गरेका हुन् । यसअघि गोपीचन्द्रको नाममा ३० मिनेट ३० दशमलब ९९ सेकेन्डको कीर्तिमान थियो ।
सोही स्पर्धामा गोपीचन्द पार्कीले निर्धारित दूरी ३० मिनेट ३८ दशमलव ३० सेकेन्डमा पूरा गर्दै रजत पदक प्राप्त गरे । सोही स्पर्धामा आर्मीकै गजेन्द्र राई तेस्रो भए । उनले निर्धारित दूरी ३० मिनेट ४९ दशमलव ५० सेकेन्डमा पूरा गरेका थिए ।
त्यस्तै एथलेटिक्सको चार सय मिटर महिला हर्डल्समा त्रिभुवन आर्मी क्लबकी जयरानी थारुले राष्ट्रिय कीर्तिमानसहित स्वर्ण पदक जितेकी छिन् । उनले निर्धारित दूरी एक मिनेट ०४।१३ सेकेन्डमा पूरा गर्दै कीर्तिमानसहित स्वर्ण पदक जितेकी हुन् । आफ्नै नामको कीर्तिमान सुधार गरेकी जयरानीले यसअघि ४४औँ राष्ट्रिय एथलेटिक्स प्रतियोगितामा एक मिनेट ०७ दशमलब दुई सेकेन्डको कीर्तिमान बनाएकी थिइन् ।
सोही स्पर्धामा एपीएफकी भागीरतीकुमारी थारुले एक मिनेट छ दशमलव छ सेकेन्डमा पूरा गर्दै रजत पदक जितिन् भने एपिएफकै कल्पना श्रेष्ठले एक मिनेट ०६दशमलव ५१ सेकेण्डको समय निकाल्दै कास्य पदक हात पारिन ।
विभागीय त्रिभुवन आर्मी क्लबका खगिता सिञ्जाली मगर र सूर्यबहादुर खत्रीले नवौंँ राष्ट्रिय खेलकुद अन्तर्गतको हाइजम्पमा स्वर्ण जितेका छन् ।
खगिताले महिलातर्फ तथा सूर्यले पुरुषतर्फ स्वर्ण पदक जितेका हुन् । सूर्यले एक दशमलव९० मिटर जम्प गर्दै स्वर्ण जित्दा बागमतीका निकेश महतोले एक दशमलव७५ मिटर जम्प गर्दै रजत जिते । पुलिसका रोशन दनुवारले पनि एक दशमलव ७५ मिटर जम्प गर्दै कास्य जित्न सफल भए ।महिलातर्फ खगिता सिञ्जाली मगरले एक दशमलव५२ मिटर जम्प गर्दै स्वर्ण पदक जितिन् । आर्मीकै विन्दु थनेतले एक दशमलव ५० मिटर जम्प गर्दै रजत जितिन् । गण्डकीकी सिमा श्रेष्ठले एक दशमलव४२ मिटर जम्प गर्दै कास्य जितिन् ।
