काठमाडौँ । आविष्कार केन्द्रले दाँत कोट्याउने सिन्का उत्पादन गर्ने मेसिन बनाउने भएको छ । साथै केन्द्रले सिन्के धूप उत्पादन गर्ने मेसिनसमेत बनाउने भएको छ । केन्द्रलाई ती मेसिन बनाउन सरकारले समेत सहयोग गर्नेछ ।
केन्द्रले आगामी वैशाखसम्ममा त्यस्तो मेसिन बनाउने गरी सरकार र केन्द्रबीच एक समझदारीपत्रमा हस्ताक्षर समेत भएको छ ।
शुक्रबार लघु, घरेलु तथा साना उद्योग प्रवद्र्धन केन्द्र र आविष्कार केन्द्रबीच समझदारीपत्रमा हस्ताक्षर भएको हो । समझदारीपत्रमा प्रवद्र्धन केन्द्रका निमित्त प्रमुख विष्णुप्रसाद भुसार र आविष्कार केन्द्रका अध्यक्ष महावीर पुनले हस्ताक्षर गर्नुभयो ।
समझदारीपत्रअनुसार मेसिनको आवश्यक प्रविधिको अध्ययन, अनुसन्धान र विकासका लागि आविष्कार केन्द्रले काम गर्नेछ ।
प्रवद्र्धन केन्द्रले सो कार्यका लागि आविष्कार केन्द्रलाई यो वर्ष रु ४० लाख आर्थिक सहयोग गर्नेछ । समझदारीपत्रमा हस्ताक्षर भएपछि आविष्कार केन्द्रका अध्यक्ष पुनले सरकारको सहयोगले आफूहरु धेरै उत्साहित भएको बताउनुभयो ।
उहाँले प्राप्त सहयोग रकमबाट सिन्केधूप, दाँत कोट्याउने सिन्का बनाउन मेसिन, झाडु, बाँसको मुढा बनाउने लगायतका मेसिन बनाउन खर्च गरिने जानकारी दिनुभयो ।
सो अवसरमा उद्योग, वाणिज्य तथा आपूर्तिमन्त्री दिलेन्द्रप्रसाद बडूले आज भएको समझदारीले आफ्नै उत्पादन प्रयोग गर्ने सरकारको राष्ट्रिय नीतिलाई सहयोग पुग्ने बताउनुभयो ।
