काठमाडौँ । निलम्बित प्रधानन्यायाधीश चोलेन्द्रशम्शेर जबराले आफूमाथि लगाइएको महाअभियोगलाई संसद् पुनःस्थापना र नयाँ सरकार गठनसँग जोड्नुभएको छ ।
प्रतिनिधिसभाको महाअभियोग सिफारिस समितिलाई बयान दिँदै उहाँले प्रतिनिधिसभा पुनःस्थापना गर्ने आफूसँगैका चार न्यायाधीशलाई पनि कारबाही गर्नुपर्ने बताउनुभयो ।
प्रतिनिधिसभा पुनःस्थापना गरेको दोष आफूलाई मात्र लगाउन नमिल्ने जिकिर गर्दै पाँचै जनालाई कारबाही नगरेर आफूमाथि मात्र महाअभियोग लगाउनुपर्ने कारण माग गर्नुभयो ।
जबराले ‘गलत भए पाँचै जना गलत हुन्छ, नेतृत्व मात्र सबै कुरा होइन भन्दै दण्डित भए सबै दण्डित हुनुपर्दैन ?’ भनी प्रश्न गर्नुभयो । निलम्बित प्रधानन्यायाधीश जबराले प्रतिनिधिसभा पुनःस्थापनाको फैसला गर्ने अरु न्यायाधीशलाई सरकारले पदक दिएको बताउनुभयो ।
फैसला विवादास्पद भएको भन्दै सांसद यशोदा सुवेदी गुरुङले विवादास्पद विषयमा चेक एन्ड ब्यालेन्स गर्ने अधिकार संसद्लाई भएको बताउनुभयो । उहाँले जबरालाई समितिमा उठेका प्रश्नलाई कसरी लिनुभएको छ भनी प्रश्न गर्नुभयो ।
जवाफमा जबराले आफू प्रश्नबाट नभाग्ने तर प्रश्नको धरातल खोतलेर यथार्थ जानकारी गराउनु आफ्नो दायित्व भउको बताउनुभयो ।
