काठमाडौँ । नेकपा एकीकृत समाजवादीका सम्मानित नेता एवं पूर्व प्रधानमन्त्री झलनाथ खनालले वामपन्थी एकता आवश्यक भए पनि तत्काल सम्भवन नभएको बताएका छन् ।
समाजवादी प्रेस संगठन नेपाल गुल्मीले सदरमुकाम तम्घासमा सोमबार आयोजना गरेको पत्रकार भेटघाट कार्यक्रममा बोल्दै खनालले सो कुरा बताएका हुन् ।
नेता खनालले वामपन्थी एकता आवश्यक भए पनि वामपन्थी राजनीतिक नेतृत्वले महसुश गर्नुपर्ने भन्दै तत्काल त्यो सम्भव नभएको बताए । अहिले निर्वाचनको तयारीमा लाग्नुपर्ने भएकाले कुनै दलहरूसँग एकीकरणको सम्भावना नभएको उनको भनाई छ ।
त्यस्तै, उनले संविधानको रक्षा गर्नका लागि पाँच दलीय गठबन्धन आवश्यक भएको बताए ।
उनले एमाले अध्यक्ष केपी शर्मा ओलीलाई लक्षित गरेर जनताले वामपन्थीहरूलाई झण्डै दुई तिहाइको मत दिएको भएपनि नेतृत्व सही नभएकाले समस्या आएको आरोप समेत लगाए ।
