काठमाडौँ । नेकपा (एकीकृत समाजवादी) का अध्यक्ष माधवकुमार नेपालले सत्ता गठबन्धनमा कुनै भरोसा नभएको बताउनुभएको छ ।
बुधबार काठमाडौँमा आयोजित पार्टीका जनप्रतिनिधिका लागि अभिमुखीकरणमा उहाँले गठबन्धनको भर पर्दा अरुको सहारामा बाँच्नुपर्ने रहेछ भन्दै गठबन्धनको गीत गाइरहँदा स्थानीय निर्वाचनमा पार्टी कमजोर भएको बताउनुभयो ।
अरुको भरमा बाँच्ने मान्छेले केही गर्न सक्तैन भन्दै उहाँले भन्नुभयो, “आफ्नै शक्तिमा भरोसा गर्ने, आफ्नै तागतमा जित्छु भन्ने भरोसा भएकाहरुले मात्र पार्टीको पनि भरोसा जित्न सक्ने रहेछन् ।”
आफ्नो आधार र शक्ति बनाउन नसक्नेहरु अरुको आशामा बाँच्नुपर्ने यथार्थ पोख्दै अध्यक्ष नेपालले आफ्नै तयारी गरेर स्थानीय निर्वाचनमा उठेको भए थप स्थान जित्न सकिने बताउनुभयो ।
आफ्नै खुट्टामा उभिन नसक्नु पार्टीको कमजोरी हो भन्दै उहाँले स्थानीय निर्वाचनका बेला कतिपयले धोका दिएको, सहमति कायम गर्न नसकिएको र पार्टीभित्रै पनि अन्तर्घात भएको उल्लेख गर्नुभयो ।
उहाँले गठबन्धनको अभ्यासका क्रममा पार्टीबाट धेरै कमजोरी भएको स्वीकार गर्नुभयो ।
