काठमाडौँ । संवैधानिक परिषद्सम्बन्धी विधेयक फिर्ता हुने भएको छ । ललितपुरको एक कार्यक्रममा आज नेपाली कांग्रेसका महामन्त्री गगन थापाले संवैधानिक परिषद्सम्बन्धी विधेयक फिर्ता हुने जानकारी दिनुभएको हो ।
प्रधानमन्त्री शेरबहादुर देउवाले आफूलाई विधेयक फिर्ता गर्ने बताउनुभएको महामन्त्री थापाको भनाइ थियो । उहाँका अनुसार प्रधानमन्त्री देउवाले गत बुधबार राष्ट्रियसभामा पेश गर्नुभएको संवैधानिक परिषद् (काम, कर्तव्य, अधिकार र कार्यविधि) सम्बन्धी ऐन, २०६६ आज/भोलि नै फिर्ता हुनेछ ।
प्रधानमन्त्री देउवाले पेश गरेको सो विधेयक तत्कालीन केपी शर्मा ओली नेतृत्वको सरकारको पालामा ल्याइएको अध्यादेशसँग मिल्दोजुल्दो प्रावधान राखेर ल्याइएको भन्दै सरकारको व्यापक आलोचना हुँदै आएको छ ।
पूर्ववर्ती सरकारले यस्तै विधेयक ल्याउँदै गर्दा नेपाली कांग्रेसले विरोध गरेको उल्लेख गर्दै महामन्त्री थापाले संविधानविपरीत ल्याइएको सो विधेयकलाई कांग्रेसले नमानेको र परिषद्को बैठकमा पार्टी सभापति देउवाले भाग पनि नलिनुभएको स्मरण गर्नुभयो ।
उहाँले हिजोको गल्तीलाई आज सही भन्न नसकिने भन्दै त्यस्तो गल्ती गर्ने छुट नेपाली कांग्रेसलाई कदापि हुननसक्ने बताउनुभयो ।
