काठमाडौं । नेकपा (एमाले) का महासचिव शंकर पोखरेलले बजेट निर्माणमा देखिएको अर्थमन्त्री जनार्दन शर्माको बदमासीमा प्रधानमन्त्री शेरबहादुर देउवाको पनि मिलेमतो भएको आरोप लगाएका छन् ।
करको दर हेरफेर गर्न अनधिकृत मानिसलाई बोलाउने र त्यसको सिसिटिभी फुटेज नष्ट गर्ने अर्थमन्त्रीको बचाउमा प्रधानमन्त्री स्वयं लागेकाले अर्थमन्त्रीले गरेको बदमासीमा प्रधानमन्त्रीको पनि मिलेमतो भएको उनले बताए ।
प्रेस चौतारी कैलालीले आयोजना गरेको पत्रकार सम्मेलनमा महासचिव पोखरेलले भने, “नत्र प्रधानमन्त्रीले छनबिन गरी कारबाही गर्नुपर्छ ।” उनले बजेट प्रकरणमा कांग्रेसकै सांसद पनि मुछिएकाले पनि प्रधानमन्त्री हच्किएको बताए ।
एमालेलाई सरकारबाट विस्थापित गर्दा मुलुकको स्थिति दुर्भाग्यपूर्ण रहेको उल्लेख गर्दै उनले वर्तमान गठबन्धन सरकार पूर्ण असफल भएको जिकिर गरे । उनले अहिले अर्थतन्त्र डामाडोल भएको, मूल्यवृद्धि अत्यधिक भएको पूँजीगत खर्च लकडाउनमा भन्दा पनि खराब भएको बताए ।
महासचिव पोखरेलले नेकपा (माओवादी केन्द्र) र नेकपा (एकीकृत समाजवादी) लाई लक्षित गर्दै नेपाली कांग्रेससँग लागेकाहरु कम्युनिष्ट शक्ति हुन नसक्ने टिप्पणी गरे । मुलुकमा एमाले मात्र बामपन्थी शक्ति रहेको उनको भनाइ थियो ।
