काठमाडौँ । जल तथा मौसम विज्ञान विभागले एक सूचना जारी गर्दै नेपाल नागरिक उड्डयन प्राधिरकणले भने जस्तो आन्तरिक उडानको ‘इनरुट फोरकास्ट’ गर्न नसक्ने बताएको छ ।
विभागले एक सूचना जारी गर्दै प्रविधि र जनशक्ति अभावका कारण यस्तो पूर्वानुमान गर्न नसकिने विभागले जनाएको हो । विभागको मौसम पूर्वानुमान महाशाखाले मौसम सेवाअन्तर्गत अन्तर्राष्ट्रिय हवाई उडानका लागि आवश्यक मौसमी सूचना र इनरुट पूर्वानुमान दिए पनि आन्तरिक हवाई उडानका लागि त्यस्तो पूर्वानुमान दिएको छैन ।
महाशाखाले काठमाडौँस्थित त्रिभुवन अन्तर्राष्ट्रिय विमानस्थलको मौसम अवलोकनको सूचना मात्र दिँदै आएको सूचनामा बताएको छ । सूचनामा आन्तरिक उडानका लागि हाल उपलब्ध जनशक्ति र प्रविधिहरुको माध्यमबाट मौसमी सूचना मात्र दिन सकिने र दैनिक क्षेत्रगत मौसमी अवस्थाको ब्रिफिङ मात्र गर्न सकिने बताइएको छ ।
यही जेठ १५ गते पोखराबाट जोमसोमतर्फ उडान भरेको तारा एयरको विमान दुर्घटना भएपछि प्राधिकरणले इनरुट सफा नभएसम्म उडान नभर्न निर्देशन जारी गरेको थियो । यद्यपि इनरुट सफा भए वा नभएको सूचना कसले दिने भन्ने अन्योल छ ।
