भैरहवा । कतारका लागि उड्नुपर्ने जजिरा एयरलाइन्सको विमान भैरहवास्थित गौतम बुद्ध अन्तर्राष्ट्रिय विमानस्थलमै रोकिएको छ । अवतरण गर्ने क्रममा विमानमा चरा ठोक्किएको आशंकामा विमानलाई रोकिएको जनाइएको छ । सो विमान आइतबार राति कतारका लागि उड्नुपर्ने कार्यतालिका थियो ।
कुवेतबाट १२१ यात्रु लिएर आएको जजिराको सो विमान गए राति पौने दुई बजे अवतरण गर्ने क्रममा चरासँग ठोक्किएको आशंका गरिएको छ । जहाजको अगाडिको भागमा रगतका टाटा देखिएकाले चरा ठोक्किएको अनुमान गरिएको हो । यद्यपि चरा कतै देखिएको छैन ।
विमानस्थलका प्रवक्ता श्यामकिशोर साहले चराको अवशेष नभेटिएपछि चरा विमानको इन्जिनभित्र गएको छ कि भनेर विमानलाई रोकेर राखिएको बताए । उनका अनुसार काठमाडौँबाट प्राविधिक आएर इन्जिनको चेकजाँच गरेर विमान सुरक्षित रहेको प्रमाणित भएपछि मात्र जहाजले उडान भर्न सक्नेछ ।
कुवेतबाट आएका सबै यात्र सकुशल रहेको बताइएको छ । कतार–भैरहवा हवाई उडान गरेको जजिराको यो चौथो उडान हो ।
