धरान ८ जेष्ठ। धरान उपमहानगरपालिकाको प्रमुख पदमा स्वतन्त्र उम्मेदवार हर्क साम्पाङको जित पक्का भएको छ । अब तीन हजार ३०० हाराहारीमा मत गणना हुन बाँकी हुँदा उनी आफ्ना निकटतम प्रतिद्वन्द्वीभन्दा चार हजार २०० भन्दा बढी मतान्तरले अघि छन् ।
लौरो चिह्न लिएर उम्मेदवारी दिनुभएका साम्पाङले अहिलेसम्म १९ हजार ५९७ मत प्राप्त गरेका छन् । उनका निकटतम प्रतिस्पर्धी नेपाली कांग्रेसका उम्मेदवार किशोर राईले १५ हजार ३१६ मत हासिल गरेका छन् । नेकपा (एमाले) की मञ्जु भण्डारी सुवेदीले १२ हजार ३४८ मत प्राप्त गरेका छन् ।
धरानमा कूल ६२ हजार ८९८ मत खसेको थियो । अहिलेसम्म ५९ हजार ६१३ मत गणना भइसकेको छ । अब तीन हजार २८५ मत मात्र गन्न बाँकी छ । साम्पाङले आफ्ना निकटतम प्रतिद्वन्द्वी राईभन्दा चार हजार २८१ मतले अघि छन् ।
अब नेपाली कांग्रेसका राईले गणना हुन बाँकी सबै मत पाए पनि साम्पाङलाई भेट्न सक्ने छैनन् । त्यसैले साम्पाङको जित सुनिश्चित भएको हो ।
