काठमाडौं । प्रेस काउन्सिल नेपालले अधिवक्ता अनन्तराज लुईंटेललाई कानुनी सल्लाहकार नियुक्ति गरेको छ । लुईंटेल संवैधानिक मामला, देवानी तथा फौज्दारी मुद्दामा दख्खल राख्छन् । उनी मिडिया सम्बद्ध कानुनमा विशेष दख्खल राख्छन् ।
संवैधानिक कानुनमा एलएलएम र राजनीतिक शास्त्रमा एमए गरेका अधिवक्ता लुईंटेल साढे दुई दशकदेखि मिडिया र अदालतसँग सम्बन्धित गतिविधिमा गहिरो चासो राख्ने कानुन व्यवसायी मानिन्छन् । उनले द हिमालयन टाइम्स दैनिक, राजधानी दैनिक, हिमालय टाइम्स दैनिक, प्रकाश साप्ताहिक र सौर्य साप्ताहिकमा आबद्ध भएर लामो समयदेखि मिडिया स्वतन्त्रताको पक्षमा कलम चलाएका छन् ।
उनको सहलेखनको मिडिया विधिशास्त्र नामक पुस्तक कलेजहरूमा समेत सन्दर्भ सामाग्रीको रुपमा लिइन्छ भने मिडिया स्वतन्त्रताका विषयमा उनका दर्जनौ लेखहरू प्रकाशित छन् ।प्रेस काउन्सिल र बार काउन्सिलका प्रकाशनहरूमा समेत उनका लेखहरु प्रकाशित छन् ।
हाल सर्वोच्च अदालत बार एशोसिएशनको कार्यसमिति सदस्य रहेका अधिवक्ता लुईंटेल संवैधानिक कानुन व्यवसायी मञ्चको निवर्तमान महासचिव समेत हुन् ।
