हेटौंडाः मकवानपुरको मकवानपुरगढी गाउँपालिकामा सोमबार बिहानसम्म चार वटा वडाको अन्तिम मतपरिणाम सार्वजनिक भएको छ । वडा नम्वर १, २, ७ र ८ को मतगणनाको अन्तिम परिणाम आइसकेको छ जसमा गाउँपालिका अध्यक्ष र उपाध्यक्षमा गठबन्धनले अग्रता कायमै राखेको छ ।
गठबन्धनबाट अध्यक्षका उम्मेदवार नेपाली कांग्रेसका दार्जे लामा नेकपा एमालेका अध्यक्ष उम्मेदवार विदुर हुमागाईं भन्दा १ हजार ५७३ मतले अगाडि रहनु भएको छ । उहाँले हालसम्म ३ हजार ५७९ मत प्राप्त गर्नु भएको छ भने हुमागाईंले २ हजार ६ मत प्राप्त गर्नु भएको छ ।
त्यसैगरी उपाध्यक्षमा गठबन्धनका उम्मेदवार माओवादी केन्द्रकी मानकुमारी पाख्रिनले एमालेका उपाध्यक्षकी उम्मेदवार सन्तु थिङ्लाई १ हजार ३६० मतले पछि पार्नु भएको छ । पाख्रिनले ३ हजार २३६ मत प्राप्त गर्दा एमालेकी थिङले १ हजार ८७६ मत प्राप्त गर्नु भएको छ । अहिले वडा नम्वर ३ र ६ को मत गणना जारी छ ।
