भैरहवास्थित गौतमबुद्ध अन्तर्राष्ट्रिय विमानस्थलमा नेपाल वायुसेवा निगमको न्यारोबडी जहाज र कुबेतबाट आएको जजिरा एयरबेजको विमान अवतरण गरेका छन् ।
विमानस्थल कार्यालयका अनुसार नेपाल वायुसेवा निगमको पहिलो विमान आज बिहान ६ बजेर ५५ मिनेटमा र जजिराको विमान ७ बजेर ८ मिनेटमा अवतरण गरेका हुन् । यससँगै नेपालमा दोस्रो अन्तर्राष्ट्रिय विमानस्थलबाट व्यवसायिक उडान प्रारम्भ भएको छ ।
नेवानिले काठमाडौंबाट व्यावसायिक उडान गरेको हो । जजिराको विमान भने दोहाबाट कुबेत ट्रान्जिट गरी नेपाल आएको हो ।
गौतमबुद्ध अन्तर्राष्ट्रिय विमानस्थलबाट व्यावसायिक उडान भने यही जेठ २९ गतेमात्र हुने नागरिक उड्डयन प्राधिकरणले जनाएको छ ।
यसअघि नेपाल एयरलाइन्सको वाइडबडी जहाजले गौतमबुद्ध विमानस्थलमा परीक्षण उडान गरिसकेको छ ।
