काठमाडौं । आर्थिक संकटमा फसेको श्रीलंकामा नागरिक आन्दोलन थप चर्किएको छ । आन्दोलन चर्कंदै जाँदा यहाँका नागरिकहरुले सरकार विरुद्धको प्रदर्शनलाई थप हिंसात्मक बनाउँदै लगेका छन् ।
गत सोमबारको यही प्रदर्शनमा एकजना सत्तारुढ दलका सांसदसहित पाँच जनाको मृत्यु भएपछि हिंसा भड्किएको हो । त्यस लगत्तै प्रदर्शनकारीहरुले श्रीलंकाका निवर्तमान प्रधानमन्त्री महिन्दा राजापाक्षेको एउटा घर जलाइदिएका छन् । त्यस लगत्तै प्रदर्शनकारीको हिंसा रोक्नका लागि यहाँको सरकारले पूरै देशमा कर्फ्यु जारी गरेको छ । कर्फ्यु उल्लंघन गर्नेहरुलाई देख्नासाथ गोली चलाउन आदेश दिइएको छ । तर पनि आन्दोलन रोकिएको छैन ।
प्रधानमन्त्री महिन्दा राजापाक्षले सोमबारै पदबाट राजीनामा दिएका थिए । तर पनि श्रीलंकाका नागरिकको आक्रोश थामिएको छैन । उनीहरुले मंगलबार राजापाक्षेको एक घरलाई जलाइदिएपछि सुरक्षाकर्मीले तत्कालै राजापाक्ष र उनका परिवारका सदस्यहरुलाई सो घरबाट उद्धार गरेको थियो । स्थिति नियन्त्रणमा लिन ठूलो संख्यामा सेना परिचालन गरिएको थियो ।
श्रीलंकाली मिडियाको समाचार अनुसार सोमबार राति श्रीलंकामा राजनीतिक दलका ५० भन्दा बढी नेताहरुको घरमा आगजनी भएको छ । उनीहरुले पनि अन्यत्र शरण लिएर बसिरहेको बताइएको छ । यहाँको अवस्था आर्थिक संकटका कारण जर्जर भएको थियो । बजारभरि महंगी छ, आफूले चाहेको सामान किन्न सक्ने अवस्था छैन । भोका प्रदर्शनकारीहरुले नेताका घरलाई निसाना बनाएका हुन् ।
श्रीलंकामा बुधबारसम्मका लागि कर्फ्यु जारी गरे पनि विरोध प्रदर्शन जारी छ । मंगलबार राजधानीका सडक सुनसान देखिए पनि रातिमा हिंसात्मक प्रदर्शनहरु भएका बीबीसीले जनाएको छ । सोमबारदेखि मंगलबारको अवधिमा सात जनाको मृत्यु भइसकेको छ भने २०० जनाभन्दा बढी घाइते भएका छन् ।
