डडेलधुरा । चुनावी अभियानका क्रममा गृहजिल्ला डडेलधुरामा रहनुभएका प्रधानमन्त्री एवं नेपाली कांग्रेसका सभापति शेरबहादुर देउवाले नेपाली कांग्रेसका उम्मेदवारलाई जिताए सुदूरपश्चिम प्रदेशको राजधानी डडेलधुरामा सार्ने आश्वासन दिनुभएको छ ।
मंगलबार अमरगढी नगरपालिकामा आयोजना गरिएको सभामा उहाँले निर्वाचनमा कांग्रेसका उम्मेदवारलाई जिताए सुदूरपश्चिम प्रदेशको राजधानी धनगढीबाट डडेलधुरा सार्ने आश्वासन दिनुभएको हो ।
मुलुकको विकास गर्ने एक मात्र पार्टी नेपाली कांग्रेस हो भन्दै उहाँले कांग्रेसलाई जिताए बिजुली, पानी र पश्चिम सेती जलविद्युत् आयोजनासमेत ल्याउने बताउनुभयो । पूर्वाधार विकास गरेर प्रदेश राजधानी डडेलधुरा बनाउने उहाँको भनाइ थियो ।
मतदान गरेर मात्र काठमाडौँ फर्कने कार्यक्रम बनाउनुभएका देउवा गृह जिल्ला डडेलधुरामा कांग्रेसकै कर्ण मल्ल समूहले नेकपा (एमाले) सँग मिलेर निर्वाचनमा उम्मेदवारी दिएपछि दबाबमा पर्नुभएको छ ।
