काठमाडौँ । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका असन्तुष्ट पक्षले नयाँ पार्टी गठन गरेको छ । पार्टीमा असन्तुष्ट रहेका धर्मेन्द्र बाँस्तालाको संयोजकत्वमा नेकपा (बहुमत) गठन भएको छ । नयाँ पार्टी गठन भएसँगै चन्द नेतृत्वको नेकपा औपचारिकरुपमा फुटेको छ ।
बास्तोलाको संयोजकत्वमा नेकपाका असन्तुष्ट पक्षले चितवनमा राष्ट्रिय भेला गरेको थियो । सोही भेलाले नयाँ पार्टी गठन गरेको हो ।
सोमबार बाँस्तोलाले पत्रकार सम्मेलन गरी नयाँ पार्टी गठन भएको जानकारी दिएका हुन् । उनका अनुसार नयाँ पार्टीको नाम नेकपा (बहुमत) रहेको छ । सो पार्टीको नेतृत्व बाँस्तोलाले नै गर्नेछन् ।
गत चैतमा भएको पार्टी केन्द्रीय समितिको बैठकको निर्णयविपरीत चन्द गएकाले नयाँ पार्टी गठन गर्नुको कुनै विकल्प नभएको उनको भनाइ थियो ।
तत्कालीन महासचिव नेत्रविक्रम चन्द र प्रवक्ता खड्गबहादुर विश्वकर्मा संसद्वादमा फसेकाले पार्टी पुनर्गठन गरिएको उनले बताए । उनले गलतरुपमा आफूहरुमाथि आर्थिक अनियमितताको आरोप लगाइएको बताए ।
बैठकले पार्टी चुनावमा नजाने निर्णय गरे पनि पार्टी प्रवक्ताले चुनावमा जाने, पार्टी दर्ताको प्रयास गर्ने, चुनावमा केन्द्रीय सदस्यलाई उठाउने र उठाउन प्रयत्न गरेको भन्दै संयोजक बाँस्तोलाले केही केन्द्रीय समिति सदस्यहरुले त नेकपा (एमाले) को चुनाव चिह्न सूर्य लिएर उठ्नेसम्म बताएपछि समय बर्बाद नगरीकन बहुमत सदस्यको भेलाले पार्टी पुनर्गठन गरेको बताए ।
उनले विचार र संगठनात्मकरुपमा आफ्नो पक्षमा बहुमत रहेको दाबी गरे । पत्रकार सम्मेलनमा उनले पार्टीको मूल कार्यदिशा वैज्ञानिक समाजवादी क्रान्ति सम्पन्न गर्ने र ती कार्यदिशा पूरा गर्न कार्यनीतिका रूपमा अहिले स्वाधीन संयुक्त सरकार, राजनीतिक स्थिरता, सामाजिक रुपान्तरण, समृद्धि र स्वाधीनताको नारा अगाडि सारेको बताए ।
