एजेन्सी । आईपीएल २०२२ को ५५ औं खेलमा चेन्नई सुपर किंग्सले दिल्ली क्यापिटल्सलाई ९१ रनले पराजित गरेको छ ।
टस हारेर पहिले ब्याटिङ गरेको चेन्नईले २० ओभरमा ६ विकेट गुमाएर २०८ रन बनाएको थियो । जवाफमा दिल्लीको टोली १७.४ ओभरमा ११७ रनमा सिमित भयो । डेभन कोनवेको उत्कृष्ट ८७ रन र मोइन अलीको घातक बलिङले चेन्नईले दिल्लीलाई हराएको हो ।
आइतबार राति भएको खेलमा मोइनले मिचेल मार्स, दिल्लीका कप्तान ऋषभ पन्त र रिपल पटेललाई पेभिलियन पठाए । त्यस्तै फास्ट बलर मुकेश चौधरी र सिमरजीत सिंहले पनि २/२ विकेट लिए । कोनवे बाहेक धोनीले पनि आठ बलमा २१ रनको अविजित इनिङ खेले । कोनवेल उनको उत्कृष्ट इनिङ्सका लागि प्लेयर अफ द म्याच समेत बने ।
टस हारेर ब्याटिङ रोजेको चेन्नईको टोलीले उत्कृष्ट सुरुवात गरेको थियो । ऋतुराज गायकवाड र डेभोन कोनवेले शतकीय साझेदारी खेले । दुवैले ५० प्लस रनको ओपनिङ साझेदारी गरेको यो लगातार तेस्रो पटक हो । ११० रनको स्कोरमा चेन्नईलाई पहिलो झटका एनरिक नोर्टजेले दिएका थिए । उनले १५२ किलोमिटर प्रतिघण्टाको गतिमा गरेको सर्ट बलमा अक्षर पटेलको हातमा ऋतुराजलाई क्याच आउट गराए ।
ऋतुराजले ३३ बलमा चार चौका र एक छक्काको मद्दतले ४१ रन बनाए । यसैबीच डेभोन कोनवेले आईपीएल करियरको तेस्रो अर्धशतक बनाए । यो उनको लगातार तेस्रो अर्धशतक हो । यसअघि कोनवेले सनराइजर्स हैदरावाद र रोयल च्यालेन्जर्स बैंग्लोरविरुद्ध अर्धशतक बनाएका थिए । दिल्लीका कप्तान पन्तले कुलदीपबाट तीन ओभर मात्रै दिए । कुलदीपले यी तीन ओभरमा ४३ रन दिन पुगे ।
चेन्नईलाई दोस्रो झटका कोनवेको रुपमा लाग्यो । इनिङ्सको १७औं ओभरमा कोनवेलाई खलील अहमदको बलमा विकेटकिपर पन्तले क्याच आउट गरेका थिए । कोनवेले शतक बनाउन गुमाए र ४९ बलमा सात चौका र पाँच छक्काको मद्दतले ८७ रन बनाए । शिवम दुबेले १९ बलमा २ चौका र २ छक्का प्रहार गर्दै ३२ रन बनाए । उनलाई मिचेल मार्सले डेभिड वार्नरको हातमा क्याच आउट गरेका थिए ।
अम्बाती रायुडु पनि १९ औं ओभरमा पेभिलियन फर्किए । रायुडुले ६ बलमा ५ रन बनाउन सके । यसपछि कप्तान धोनीले नेतृत्व लिए । मैदानमा आउनेबित्तिकै उनले दोस्रो बलमा छक्का र तेस्रो बलमा चौका हाने । अन्तिम ओभरमा एनरिक नोर्टजेले लगातार दुई बलमा मोइन अली र रोबिन उथप्पालाई पेभिलियन पठाए ।
धोनीले पारीको अन्तिम दुई बलमा दुई–दुई रन लिए । यसप्रकार चेन्नईले २० ओभरमा २०८ रन बनाएको थियो । कप्तान धोनीले आठ बलमा २१ रन बनाएर अविजित रहे । धोनीले आफ्नो इनिङ्समा एक चौका र दुई छक्का प्रहार गरे । अन्तिम ५ ओभरमा चेन्नईले ५ विकेट गुमाएर ६० रन बनाएको थियो । धोनीसँग ड्वेन ब्राभो एक रनमा अविजित रहे । दिल्लीका लागि एनरिक नोर्टजेले सर्वाधिक ३ विकेट लिए । त्यस्तै खलील अहमदले दुई र मिचेल मार्सले एक विकेट लिए ।
२०९ रनको लक्ष्य पछ्याएको दिल्लीको टोलीको सुरुवात खराब रह्यो । श्रीकर भरतले उत्कृष्ट दुई चौका प्रहार गरेपछि मोइन अलीलाई सिमरजीत सिंहले क्याच दिए । भरत पाँच बलमा आठ रन बनाएर आउट भए । यसपछि डेभिड वार्नरले पनि आफ्नो विकेट गुमाए । उनलाई महेश टिक्षानाले एल्बडब्ल्यू आउट गरेका थिए । वार्नर १२ बलमा एक चौका र दुई छक्का प्रहार गर्दै १९ रन बनाएर आउट भए ।
३६ रनमा दुई विकेट खसेपछि मिचेल मार्स र कप्तान ऋषभ पन्तले सम्हाल्ने प्रयास गरेका थिए । दुवैले तेस्रो विकेटका लागि ३६ रनको साझेदारी गरे । तर, यसपछि अफ स्पिनर मोइन अलीले खेललाई आफ्नो टोली चेन्नईतर्फ लगे । उनले तीन विकेट लिए । दिल्लीको इनिङ्सको आठौं ओभरमा मोइनले मिचेल मार्सलाई बाउन्ड्री लाइनमा ऋतुराज गायकवाडको हातमा क्याच आउट गरेका थिए । मार्सले २० बलमा तीन चौका र एक छक्काको मद्दतमा २५ रन बनाउन सके ।
त्यसपछि १० औं ओभरमा मोइनले कप्तान पन्त र रिप्पल पटेल दुवैलाई पेभिलियन पठाए । मोइनले ओभरको पहिलो बलमा कप्तान ऋषभ पन्तलाई बोल्ड गरे । पन्तले ११ बलमा २१ रन बनाउन सके । यसपछि मोइनको सोही ओभरको तेस्रो बलमा रिपल पटेलले छक्का प्रहार गरे । चौथो बलमा रिपलले फेरि ठूलो सट प्रहार गर्न खोजे तर कोनवेले बाउन्ड्री लाइनमा उनको उत्कृष्ट क्याच समाए । रिपलले तीन बलमा ६ रन बनाउन सके ।
त्यसपछि बायाँ हाते फास्ट बलर मुकेश चौधरी ११ औं ओभरमा बलिङ गर्न आए । उनले सो ओभरमा अक्षर पटेल र रोभम्यान पावेललाई पेभिलियन पठाए । ओभरको पहिलो बलमा मुकेशले अक्षरलाई क्लिन बोल्ड गरे । अक्षरले तीन बलमा एक रन बनाउन सके । सोही क्रममा मुकेशले रोभमानलाई विकेटकिपर धोनीको हातमा क्याच आउट गराए । रोभम्यानले नौ बलमा तीन रन बनाउन सके ।
९९ रनको कुल स्कोरमा दिल्लीलाई आठौं झटका लाग्यो । सिमरजीत सिंहले कुलदीप यादवलाई रोबिन उथप्पाको हातमा क्याच आउट गराए । कुलदीप १७ बलमा पाँच रन बनाएर आउट भए । १८ औं ओभरको तेस्रो बलमा शार्दुल ठाकुरलाई धोनीले ड्वेन ब्राभोको हातमा क्याच आउट गरेका थिए । शार्दुलले १९ बलमा २४ रन बनाउन सके । अर्को बलमा खलील अहमदलाई क्लिन बलिङ गरेपछि ब्राभोले दिल्ली ११७ रनमा समेटियो ।
यो जितसँगै चेन्नईको प्लेअफ पुग्ने आशा कायमै रहेको छ । उसको ११ खेलमा चार जित र सात हारसहित आठ अंक छ । चेन्नई आठौं स्थानमा रहेको छ । चेन्नईले बाँकी तीन खेल जित्नुपर्नेछ । यसपछि बाँकी टिमको नतिजामा पनि भर पर्छ ।
अर्कोतर्फ यो हारसँगै दिल्लीको आशालाई पनि धक्का लागेको छ । उसको ११ खेलमा पाँच जित र छ हारसहित १० अंक छ । हाल पाँचौं स्थानमा रहेको दिल्लीले बाँकी तीन खेल जित्नुपर्नेछ ।
