नेकपा (माओवादी केन्द्र)का एवम् पूर्वप्रधानमन्त्री अध्यक्ष पुष्पकमल दाहालले मेयरका उम्मेदवारद्धय रेणु दाहाल र सृजना सिंहलाई अवमूल्यन गर्ने काम गरिएको भन्दै आक्रोश व्यक्त गर्नु भएको छ ।
अध्यक्ष दाहालले दाहाललाई आफ्नी छोरीको रुपमा र सिंहलाई प्रकाशमान सिंहको श्रीमतिको रुपमा प्रचार गरेर केही मानिसहरुले उनीहरुको अवमूल्यन गर्ने काम गरिरहेको बताउनु भएको हो ।
सत्तारुढ गठबन्धनले शुक्रबार काठमाडौंमा आयोजना गरेको चुनावी सभामा बोल्दै उहाँले छोरी रेणुप्रति संकेत गर्दै जहाँजहाँ महिलाहरुले नेतृत्व लिएर काम गरे, त्यहाँ राम्रो काम भएको दावी गर्नु भयो । अध्यक्ष दाहालले महिला उम्मेदवारहरुमाथि विश्वास गर्ने र उनीहरुको योग्यतालाई सम्मान गरेर अघि बढनु मुलुककै आवश्यक्ता भएको जिकीर समेत गर्नु भयो ।
उहाँले पुरुषहरुले राज गरेर धेरै लछारपाटो नलगाएको उल्लेख गर्दै अव महिलाहरुलाई त्यो अवसर दिनुपर्ने निष्कर्षमा आफू पुगेको पनि स्पष्ट पार्नुु भयो । अध्यक्ष दाहालले भन्नु भयो, ‘हिजो युद्धको बेलामा, शान्ति र संविधान निर्माणको बेलामा महिलाहरुलाई हुनत यी मेयरका दुईटा प्रत्याशीका बारेमा एकथरी मान्छेहरुले नकारात्मक टिप्पणी नगरेका होईनन् । कसैलाई छोरीको रुपमा, कसैलाई श्रीमतिको रुपमा प्रचार गरेर महिलाहरुलाई कहिँनकहीँ अपमानित गर्ने, महिला भित्रको क्षमतालाई अवमूल्यन गर्ने एक थरी मानिसका कोसिस छन । म त्यो प्रवृत्तिलाई हृदयदेखि विरोध गर्न चाहन्छु । त्यो नकारात्मक प्रवृत्ति हो ।
अहिले घटनाक्रमले के सावित गरेको छ भने जहाँ–जहाँ महिलाहरु कार्यकारी भूमिकामा रहेका छन, त्यहाँत्यहाँ राम्रो काम भएको छ । त्यसकारण महिलाहरुमाथि विश्वास गर्ने, उनीहरुको योग्यतालाई सम्मान गर्ने आजको देशकै आवश्यक्ता हो भन्ने मैले ठान्छु । हामी पुरुषहरुले धेरै राज ग¥यौं, तर धेरै साह्रो लछारपाटो पनि लगाउन सकिएन । एकचोटी महिलाहरुलाई कार्यकारी भूमिका दिएर हेरौं । यस अर्थमा हाम्रो संविधान कार्यान्वयनको दृष्टिले पनि र परिवर्तनलाई संस्थागत गर्ने दृष्टिकोणले पनि र परिवर्तनबाट नेपाली जनताले प्रगतिको अनुभूति गर्ने वातावरण बनाउनका लागि पनि यो पक्षलाई विशेष रुपले मनन गर्नुपर्दछ भन्ने मलाई लाग्दछ ।’
अध्यक्ष दाहालले संविधान कार्यान्वयनको दृष्टिकोणले पनि, परिवर्तनलाई संस्थागत गर्ने दृष्टिकोणले पनि र नेपाली जनतामा परिवर्तनको अनुभूति गराउन पनि महिलाहरुलाई विशेष रुपले अघि बढाउनुपर्ने तर्क गर्नु भयो ।
तस्बिर -रत्न श्रेष्ठ, रासस
